ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠳᠦᠷᠪᠡᠳ ᠰᠤᠨᠢᠷᠬᠠᠯ
ᠳᠤᠷᠤᠨᠠᠲ᠋ᠡᠭᠷᠢ ᠶᠢᠨ ︽ᠨᠢᠰᠦᠨ ᠤᠳᠤᠭᠰᠠᠨ ᠪᠤᠯᠵᠤᠮᠤᠷ︾ ᠢ ᠠᠮᠳᠠᠷᠬᠠᠭᠠᠳ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/12/18
     ᠤᠳᠬ᠎ᠠ ᠵᠤᠬᠢᠶᠠᠯ ᠤᠨ ᠤᠨᠤᠯᠴᠢ ᠬᠠᠰᠪᠤ ︽ᠤᠯᠠᠭᠠᠨ ᠠᠰᠠᠷ ᠤᠨ ᠵᠡᠭᠦᠳᠦᠨ︾ ᠤ ᠭᠤᠸ᠎ᠠ ᠰᠠᠶᠢᠬᠠᠨ ᠢ ᠠᠵᠢᠬᠤ ᠳᠠᠭᠠᠨ ︽ᠤᠳᠬ᠎ᠠ ᠤᠶᠠᠩᠭ᠎ᠠ ᠳᠤᠷ ᠦᠯᠡᠮᠵᠢ ᠪᠤᠢ᠂ ᠡᠰᠡ ᠳᠠᠭᠤᠰᠪᠠᠰᠤ ᠤᠷᠠᠨ ᠪᠤᠯᠠᠢ︾ ᠭᠡᠰᠡᠨ ᠬᠦᠨ ᠤᠳᠬᠠᠳᠠᠢ ᠦᠬᠡ ᠶᠠᠷᠢᠭᠰᠠᠨ ᠪᠢᠯᠡ᠂ ᠤᠳᠬ᠎ᠠ ᠤᠶᠠᠩᠭ᠎ᠠ ᠶᠢᠨ ᠤᠷᠠᠨ ᠭᠡᠵᠦ ︽ᠦᠬᠡ ᠬᠡᠳᠦ᠋ᠢᠪᠡᠷ ᠳᠠᠭᠤᠰᠤᠭᠰᠠᠨ ᠴᠦ ᠰᠠᠨᠠᠭᠠᠨ ᠳᠡᠩᠳᠡ ᠦᠷᠬᠦᠯᠵᠢᠯᠡᠬᠦ︾ ᠦᠯᠡᠮᠵᠢ ᠶᠢᠨ ᠴᠢᠨᠠᠷ ᠢ ᠦᠬᠦᠯᠡᠭᠰᠡᠨ ᠪᠤᠶᠤ᠃ ᠢᠷᠠᠭᠤ ᠨᠠᠶᠢᠷᠠᠭ᠂ ᠳᠤᠭᠤᠵᠢᠰ᠂ ᠨᠠᠶᠢᠷᠠᠭᠤᠯᠤᠯ ᠴᠢᠨᠠᠭᠰᠢᠯᠠᠭᠠᠳ ᠤᠷᠠᠨ ᠵᠢᠷᠤᠭ ᠱᠤᠭᠤᠮᠠᠯ ᠠᠯᠢ ᠨᠢ ᠴᠦ ᠭᠡᠰᠡᠨ ᠦᠯᠡᠮᠵᠢ ᠪᠠᠭᠳᠠᠭᠠᠮᠵᠢ᠂ ᠦᠷᠬᠦᠯᠵᠢᠯᠡᠨ ᠰᠡᠳᠭᠢᠬᠦᠯᠬᠦ ᠶᠢᠨ ᠳᠤᠮᠳᠠ ᠭᠤᠸ᠎ᠠ ᠰᠠᠶᠢᠬᠠᠨ ᠤ ᠢᠳᠡ ᠳᠠᠮᠢᠷ ᠢᠶᠠᠨ ᠦᠵᠡᠭᠦᠯᠳᠡᠭ ᠪᠢᠯᠡ᠃     ᠳᠤᠮᠤᠭ᠂ ᠳᠤᠤᠯᠢ᠂ ᠢᠷᠠᠭᠤ ᠨᠠᠶᠢᠷᠠᠭ᠂ ᠮᠤᠳᠧᠷᠨᠢᠰᠲ ᠵᠦᠴᠦᠭᠡ ᠶᠢᠨ ᠤᠷᠠᠯᠢᠭ᠂ ᠤᠯᠠᠮᠵᠢᠯᠠᠯ ᠪᠠ ᠭᠦᠷᠳᠡᠭᠦᠢ ᠶᠢᠨ ᠤᠯᠠᠨ ᠡᠯᠧᠮᠧᠲ ᠶᠢ ᠠᠭᠰᠢᠭᠠᠭᠰᠠᠨ ︽ᠨᠢᠰᠦᠨ ᠤᠳᠤᠭᠰᠠᠨ ᠪᠤᠯᠵᠤᠮᠤᠷ︾ ᠰᠢᠯᠦᠭ ᠤᠨ ᠪᠠᠭᠳᠠᠭᠠᠮᠵᠢ ᠳᠤ ᠰᠤᠴᠢᠨ ᠭᠠᠶᠢᠬᠠᠬᠤ ᠶᠤᠮ᠃     ︽ᠬᠦᠬᠡ ᠮᠦᠩᠭᠦᠨ ᠤᠭᠳᠠᠷᠭᠤᠢ ᠶᠢ ᠬᠤᠷᠮᠤᠢ ᠶᠢᠨ ᠳᠡᠳᠦᠢ ᠪᠠᠶᠢᠬᠤ ᠳᠤ᠂ ᠬᠦᠷᠦᠰᠦᠳᠦ ᠠᠯᠳᠠᠨ ᠳᠡᠯᠡᠬᠡᠢ ᠶᠢ ᠠᠯᠭᠠᠨ ᠤ ᠳᠡᠳᠦᠢ ᠪᠠᠶᠢᠬᠤ ᠳᠤ ᠁︾ ᠭᠡᠳ ᠡᠬᠢᠯᠡᠭᠰᠡᠨ ᠢ ᠨᠢ ᠤᠩᠰᠢᠬᠤ ᠳᠤ ᠮᠤᠩᠭᠤᠯ ᠳᠤᠤᠯᠢ ᠶᠢᠨ ᠬᠡᠪ ᠨᠠᠮᠪᠠ ᠠᠮᠳᠠᠭᠳᠠᠨ᠎ᠠ︔ ᠤᠳᠠᠬᠤ ᠦᠬᠡᠢ ᠨᠢᠬᠡ ᠲᠷᠤᠶᠠ ᠬᠤᠳᠡ᠂ ᠠᠯᠺᠰᠠᠨᠳᠡᠷ ᠬᠠᠭᠠᠨ ᠳᠤᠷᠤᠰᠤᠭᠳᠠᠭᠠᠳ ᠪᠠᠶᠢᠬᠤ ᠨᠢ ᠬᠤᠮᠧᠷ ᠤᠨ ᠳᠤᠤᠯᠢ᠂ ᠭᠷᠸᠢᠭ ᠤᠨ ᠳᠤᠮᠤᠭ ᠢ ᠪᠤᠳᠤᠭᠳᠠᠭᠤᠯᠤᠨ᠎ᠠ︔ ︽ᠮᠦᠷᠦᠭᠡᠳᠦᠯ ᠠᠴᠠ ᠪᠠᠰᠠ ᠤᠷᠳᠤ᠂ ᠮᠦᠷᠦᠭᠡᠳᠦᠯ ᠠᠴᠠ ᠪᠠᠰᠠ ᠬᠦᠨᠳᠦ / ᠠᠶ᠎ᠠ᠂ ᠠᠮᠢ ᠨᠠᠰᠤᠨ ᠤ ᠭᠤᠸ᠎ᠠ ᠦᠵᠡᠰᠭᠦᠯᠡᠩ ᠢ ᠡᠬᠡ ᠭᠠᠵᠠᠷ ᠤᠨ ᠡᠯᠢᠬᠡᠨ ᠳᠡᠭᠡᠷ᠎ᠡ ᠵᠢᠷᠤᠵᠤ ᠰᠠᠭᠤᠬᠤ ᠳᠤ / ᠠᠷᠪᠠᠨ ᠬᠤᠷᠤᠭᠤᠨ ᠠᠴᠠ ᠠᠰᠬᠠᠷᠠᠨ ᠪᠠᠭᠤᠬᠤ ᠢᠷᠠᠭᠤ ᠤᠶᠠᠩᠭ᠎ᠠ ᠁︾ ᠬᠡᠰᠡᠨ ᠪᠤᠯ ᠳᠡᠷᠡ ᠴᠢᠭ ᠢᠶᠠᠷ ᠢᠶᠠᠨ ᠰᠡᠭᠡᠭᠡᠳᠡᠨ ᠤ ᠪᠢᠴᠢᠯᠭᠡ᠂ ᠰᠢᠨ᠎ᠡ ᠵᠠᠭᠤᠨ ᠤ ᠰᠢᠨ᠎ᠡ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠰᠡᠳᠭᠢᠬᠦᠢ︔ ᠤᠷᠭᠤᠮᠠᠯ ᠬᠦᠮᠦᠨ ᠳᠠᠴᠢᠶᠠᠬᠤ᠂ ᠬᠦᠮᠦᠨ ᠠᠮᠢᠳᠠᠨ ᠬᠤᠷᠢᠴᠠᠬᠤ ᠬᠢᠭᠡᠳ ︽ᠮᠦᠷᠦᠭᠡᠳᠦᠯ ᠠᠴᠠ ᠤᠨᠠᠭᠰᠠᠨ ᠠᠯᠳᠠᠨ ᠰᠠᠯᠠᠭᠠᠳᠤ ᠰᠦᠨᠢ︾ ᠹᠷᠦᠽᠧᠷ ᠬᠢᠭᠡᠳ ᠬᠦᠮᠦᠨ ᠠᠨᠽᠤᠫᠤᠯᠤᠬᠢ ᠶᠢᠨ ᠠᠯᠢ ᠤᠯᠠᠨ ᠬᠠᠴᠢᠨ ᠰᠤᠨᠢᠨ ᠶᠢᠷᠳᠢᠨᠴᠦ ᠶᠢ ᠰᠠᠨᠠᠭᠠᠨ ᠳᠤ ᠤᠷᠤᠭᠤᠯᠬᠤ ᠪᠤᠶᠤ᠂ ︽ᠪᠤᠯᠵᠤᠭᠠᠳᠤ ᠶᠢᠨ ᠪᠤᠷᠤ ᠳᠤᠯᠤᠭᠠᠢ︾᠂ ︽ᠠᠯᠬᠢᠨᠴᠢ ᠴᠡᠷᠢᠭ ᠤᠨ ᠠᠷᠪᠠᠳᠤ ᠶᠢᠨ ᠨᠤᠶᠠᠨ︾ ᠡᠷᠳᠡᠨ ᠤ ᠰᠤᠶᠤᠯ ᠠᠴᠠ ᠦᠪᠡᠷ ᠤᠨ ᠠᠶᠢᠳᠧᠨᠳᠧᠲ ᠢᠶᠠᠨ ᠡᠷᠢᠬᠦ ᠭᠡᠰᠡᠨ ᠵᠤᠬᠢᠶᠠᠭᠴᠢ ᠶᠢᠨ ᠤᠤᠭᠠᠨ ᠬᠦᠰᠡᠯ︔ ᠠᠯᠫᠠᠰ᠂ ᠠᠷᠭᠤ᠋᠂ ᠰᠠᠺᠥᠷᠠ ᠁ ᠠᠯᠢ ᠤᠯᠠᠨ ᠬᠠᠷᠢ ᠶᠢᠨ ᠦᠵᠡᠮᠵᠢ᠂ ᠡᠷᠢᠶᠠᠨ ᠪᠠᠷᠠᠭᠠᠨ ᠬᠠᠷᠢ ᠶᠢᠨ ᠰᠤᠶᠤᠯ︔ ᠦᠯᠦ ᠬᠠᠷᠠᠭᠳᠠᠬᠤ ᠬᠤᠶᠠᠷ ᠬᠦᠮᠦᠨ ᠡᠷᠳᠡᠨ ᠤ ᠳᠤᠮᠤᠭ᠂ ᠡᠳᠦᠭᠡ ᠶᠢᠨ ᠵᠤᠭᠤᠭ᠂ ᠬᠠᠷᠢ ᠶᠢᠨ ᠶᠢᠷᠳᠢᠨᠴᠦ᠂ ᠬᠤᠷᠸ᠎ᠠ ᠶᠢᠨ ᠰᠤᠨᠢᠨ ᠠᠴᠠ ᠦᠪᠡᠷ ᠦᠪᠡᠷ ᠤᠨ ᠤᠶᠤᠨ ᠤᠬᠠᠭᠠᠨ ᠤ ᠪᠠᠨ ᠬᠦᠨ ᠵᠦᠭ ᠨᠡᠪᠳᠡᠷᠡᠵᠦ ᠪᠠᠶᠢᠬᠤ ᠨᠢ ᠤᠯᠠᠨ ᠳᠤ ᠠᠯᠳᠠᠷᠰᠢᠭᠰᠠᠨ ᠠᠶᠢᠷᠯᠠᠨᠳ᠋ ᠤᠨ ᠳᠡᠷᠡ ᠵᠦᠴᠦᠭᠡ ᠶᠢ ᠰᠠᠨᠠᠭᠠᠨ ᠳᠤ ᠤᠷᠤᠭᠤᠯᠳᠠᠭ ᠰᠠᠨ᠃     ᠪᠠᠭᠳᠠᠭᠠᠮᠵᠢ ᠨᠢ ᠢᠷᠠᠭᠤ ᠨᠠᠶᠢᠷᠠᠭ ᠭᠠᠭᠴᠠ ᠳᠡᠭᠦᠨ ᠤ ᠤᠷᠠᠯᠢᠭ ᠤᠨ ᠬᠡᠪ ᠴᠢᠨᠠᠷ ᠪᠤᠰᠤ᠂ ᠭᠦᠦᠷᠨᠢᠯ ᠤᠷᠠᠯᠢᠭ ᠪᠠᠭᠳᠠᠭᠠᠮᠵᠢ ᠶᠢ ᠨᠡᠩ ᠴᠢᠬᠤᠯᠠᠴᠢᠯᠠᠨ᠎ᠠ᠃ ᠭᠡᠳᠡᠯ᠎ᠡ ᠪᠠᠭᠳᠠᠭᠠᠮᠵᠢ ᠨᠢ ᠢᠷᠠᠭᠤ ᠨᠠᠶᠢᠷᠠᠭ ᠢ ᠨᠡᠩ ᠬᠠᠴᠢᠨ ᠰᠤᠨᠢᠨ᠂ ᠨᠡᠩ ᠠᠭᠤᠳᠠᠮ ᠬᠠᠨᠠᠭᠠᠷ᠂ ᠨᠡᠩ ᠬᠦᠨ ᠬᠤᠯᠠ ᠶᠢᠨ ᠪᠤᠯᠭᠠᠳᠠᠭ᠃ ᠳᠦᠷᠰᠦᠯᠡᠭᠳᠡᠭᠦᠨ ᠤ ᠪᠠᠶᠠᠯᠢᠭ ᠨᠢ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠰᠠᠨᠠᠭ᠎ᠠ ᠠᠬᠤᠢ ᠶᠢ ᠪᠠᠶᠠᠯᠢᠭᠵᠢᠭᠤᠯᠵᠤ᠂ ᠤᠩᠰᠢᠭᠴᠢ ᠶᠢ ᠦᠯᠦ ᠮᠡᠳᠡᠭ ᠤᠨ ᠳᠤᠮᠳᠠ ᠳᠦᠰᠦᠭᠡᠯᠡᠯ ᠤᠨ ᠪᠠᠶᠠᠯᠢᠭ ᠶᠢᠷᠳᠢᠨᠴᠦ ᠳᠤ ᠭᠦᠳᠦᠯᠦᠨ ᠤᠷᠤᠭᠤᠯᠳᠠᠭ᠃ ᠰᠢᠯᠦᠭ ᠤᠨ ᠪᠠᠭᠳᠠᠭᠠᠮᠵᠢ ᠭᠡᠵᠦ ᠰᠣᠨᠢᠨ ᠰᠡᠪᠡᠭᠦᠨ ᠶᠢᠷᠳᠢᠨᠴᠦ ᠶᠢᠨ ᠵᠢᠷᠤᠭᠯᠠᠯ ᠠᠴᠠ ᠪᠤᠯᠤᠭᠰᠠᠨ ᠰᠠᠨᠠᠭ᠎ᠠ ᠠᠬᠤᠢ ᠶᠢᠨ ᠤᠷᠠᠨ ᠪᠠ ᠤᠩᠰᠢᠭᠴᠢ ᠳᠤ ᠤᠯᠭᠤᠬᠤ ᠤᠶᠤᠨ ᠪᠤᠳᠤᠯ ᠤᠨ ᠳᠡᠭᠦᠯᠢᠯ᠂ ᠬᠠᠭᠤᠳᠠᠰᠤ ᠦᠨᠳᠦᠷᠯᠡᠭᠰᠡᠨ ᠪᠠᠶᠢᠪᠠᠴᠤ ᠰᠠᠨᠠᠭ᠎ᠠ ᠳᠠᠭᠤᠰᠬᠤ ᠦᠬᠡᠢ ᠪᠠᠶᠢᠳᠠᠭ ᠤᠷᠠᠯᠢᠭ ᠤᠨ ᠭᠦᠴᠦᠰᠦ᠃ ︽ᠨᠢᠰᠦᠨ ᠤᠳᠤᠭᠰᠠᠨ ᠪᠤᠯᠵᠤᠮᠤᠷ︾ ᠢ ᠤᠩᠰᠢᠭᠰᠠᠨ ᠬᠤᠶᠢᠨ᠎ᠠ ᠰᠠᠨᠠᠭ᠎ᠠ ᠪᠤᠳᠤᠯ ᠭᠦᠪᠪᠦᠯᠵᠡᠭᠡᠳ ᠪᠠᠶᠢᠳᠠᠭ ᠤᠨ ᠰᠢᠯᠳᠠᠭᠠᠨ ᠨᠢ᠂ ᠳᠡᠭᠦᠨ ᠤ ᠨᠠᠮᠬᠠᠷᠠᠰᠢ ᠦᠬᠡᠢ ᠤᠶᠤᠨ ᠪᠤᠳᠤᠯ ᠤᠨ ᠬᠤᠷᠸ᠎ᠠ ᠳᠤ ᠭᠦᠳᠦᠯᠬᠦ ᠴᠢᠳᠠᠪᠬᠢ ᠠᠴᠠ ᠪᠤᠯᠤᠭᠰᠠᠨ ᠰᠠᠨ᠂ ᠨᠠᠮ ᠵᠢᠮᠭᠡᠨ ᠬᠦᠦᠷᠨᠢᠯ ᠨᠢ ᠬᠦᠮᠦᠰ ᠢ ᠤᠷᠠᠨ ᠪᠤᠳᠤᠯ ᠤᠨ ᠠᠭᠤᠳᠠᠮ ᠵᠠᠢ ᠳᠤ ᠭᠦᠳᠦᠯᠵᠦ᠂ ᠬᠦᠮᠦᠰ ᠲᠤ ᠰᠡᠳᠭᠢᠬᠦᠢ ᠶᠢᠨ ᠤᠯᠠᠨ ᠪᠤᠯᠤᠮᠵᠢ ᠤᠯᠭᠤᠵᠤ᠂ ᠬᠦᠷᠬᠦᠢ ᠶᠢᠨ ᠬᠦᠰᠡᠯ ᠬᠢᠭᠡᠳ ᠬᠦᠷᠦᠰᠢ ᠦᠬᠡᠢ ᠶᠢᠨ ᠬᠢᠵᠠᠭᠠᠷ ᠤᠨ ᠳᠤᠮᠳᠠ ᠳᠡᠭᠦᠯᠢᠬᠦᠯᠵᠦ ᠪᠠᠶᠢᠳᠠᠭ᠃ ᠡᠨᠡ ᠪᠤᠯ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠪᠠᠭᠳᠠᠭᠠᠮᠵᠢ᠂ ︽ᠡᠰᠡ ᠳᠠᠭᠤᠰᠬᠤ︾ ᠶᠢᠨ ᠤᠷᠠᠨ ᠮᠦᠨ᠃                              ᠬᠤᠶᠠᠷ      ᠢᠷᠠᠭᠤ ᠨᠠᠶᠢᠷᠠᠭ ᠪᠤᠯ ᠡᠴᠢᠨ᠎ᠡ ᠪᠦᠷᠦᠭ᠃ ︽ᠨᠢᠰᠤᠨ ᠤᠳᠤᠭᠰᠠᠨ ᠪᠤᠯᠵᠤᠮᠤᠷ︾ ᠲᠤ ᠶᠠᠭᠤ ᠴᠦ ᠦᠬᠦᠯᠡᠭᠡ ᠦᠬᠡᠢ ᠪᠠᠷ ᠶᠡᠭᠡ ᠤᠯᠠᠨ ᠢ ᠦᠬᠦᠯᠡᠭᠰᠡᠨ ᠮᠡᠳᠦ᠂ ᠪᠠᠰᠠ ᠶᠡᠭᠡ ᠤᠯᠠᠨ ᠢ ᠦᠬᠦᠯᠡᠭᠰᠡᠨ ᠪᠠᠶᠢᠭᠠᠳ ᠶᠠᠭᠤ ᠴᠦ ᠶᠠᠷᠢᠭ᠎ᠠ ᠦᠬᠡᠢ ᠰᠢᠭ᠃ ᠰᠢᠯᠦᠭ ᠤᠨ ᠭᠠᠷᠴᠠᠭ ︽ᠨᠢᠰᠦᠨ ᠤᠳᠤᠭᠰᠠᠨ ᠪᠤᠯᠵᠤᠮᠤᠷ︾ ᠪᠤᠯ ᠰᠢᠯᠦᠭ ᠤᠨ ᠶᠡᠷᠦᠩᠬᠡᠢ ᠰᠠᠨᠠᠭ᠎ᠠ ᠳᠦᠷᠢ ᠪᠤᠶᠤ ᠨᠢᠭᠡᠳᠡᠬᠢ ᠰᠠᠨᠠᠭ᠎ᠠ ᠳᠦᠷᠢ᠃ ᠭᠠᠷᠴᠠᠭ ᠢ ᠤᠩᠰᠢᠭᠠᠳ ᠡᠩ ᠳᠡᠷᠢᠭᠦᠨ ᠳᠤ ᠲᠧᠭᠤᠷ ᠤᠨ ︽ᠪᠤᠯᠵᠤᠮᠤᠷ ᠤᠳᠤᠭᠰᠠᠨ ᠳᠡᠭᠦᠪᠦᠷᠢ︾ ᠢ ᠰᠠᠨᠠᠭᠠᠨ ᠳᠤ ᠤᠷᠤᠪᠠ᠂ ᠭᠡᠳᠡᠯ᠎ᠡ ᠤᠩᠰᠢᠭᠰᠠᠨ ᠬᠤᠶᠢᠨ᠎ᠡ ᠡᠨᠡ ᠬᠤᠶᠠᠷ ᠪᠤᠯᠵᠤᠮᠤᠷ ᠠᠳᠠᠯᠢ ᠪᠢᠰᠢ ᠭᠡᠳᠡᠭ ᠨᠢ ᠮᠡᠳᠡᠭᠳᠡᠨ᠎ᠡ᠃ ᠨᠢᠰᠦᠨ ᠤᠳᠤᠭᠰᠠᠨ ᠪᠤᠯᠵᠤᠮᠤᠷ ᠶᠠᠭᠤ ᠪᠤᠢ᠂ ᠶᠠᠭᠤ ᠴᠦ ᠪᠠᠶᠢᠵᠤ ᠪᠤᠯᠤᠨ᠎ᠠ᠂ ᠶᠠᠭᠤ ᠴᠦ ᠪᠢᠰᠢ ᠪᠠᠶᠢᠵᠤ ᠪᠤᠯᠤᠨ᠎ᠠ᠃ ᠡᠨᠡ ᠨᠢ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠠᠮᠳᠠᠷᠬᠠᠬᠤ ᠤᠷᠠᠯᠢᠭ ᠪᠤᠯᠬᠤ ᠠᠴᠠ ᠪᠢᠰᠢ᠂ ᠳᠠᠶᠢᠯᠪᠤᠷᠢᠯᠠᠬᠤ ᠮᠡᠳᠡᠯᠭᠡ ᠪᠢᠰᠢ ᠰᠢᠨᠵᠢ ᠴᠢᠨᠠᠷ ᠢ ᠦᠵᠡᠭᠦᠯᠵᠦ ᠪᠠᠶᠢᠨ᠎ᠠ᠃ ᠵᠤᠬᠢᠶᠠᠭᠴᠢ ᠶᠢᠨ ᠪᠤᠳᠤᠯ ᠳᠤ ︽ᠪᠤᠯᠵᠤᠮᠤᠷ︾ ᠨᠢ ᠶᠠᠭᠤ ᠶᠢ ᠪᠡᠯᠭᠡᠳᠡᠵᠦ ᠪᠠᠶᠢᠨ᠎ᠠ ᠭᠡᠳᠡᠭ ᠢ ᠵᠦᠪᠬᠡᠨ ᠵᠤᠬᠢᠶᠠᠭᠴᠢ ᠦᠪᠡᠷ ᠢᠶᠠᠨ ᠯᠠ ᠮᠡᠳᠡᠵᠤ᠂ ᠦᠪᠡᠷ ᠢᠶᠠᠨ ᠯᠠ ᠶᠠᠷᠢᠨ᠎ᠠ᠂ ᠭᠡᠬᠦ ᠳᠤ ᠰᠢᠯᠦᠭ ᠲᠠᠬᠢ ︽ᠪᠤᠯᠵᠤᠮᠤᠷ︾ ᠮᠢᠩᠭᠠᠨ ᠵᠦᠢᠯ ᠪᠠᠶᠢᠵᠤ ᠪᠤᠯᠬᠤ ᠨᠢ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠪᠠᠭᠳᠠᠭᠠᠮᠵᠢ ᠬᠢᠭᠡᠳ ᠭᠤᠸ᠎ᠠ ᠰᠠᠶᠢᠬᠠᠨ ᠤ ᠭᠦᠴᠦᠨ ᠴᠢᠳᠠᠯ ᠪᠤᠯᠬᠤ ᠶᠤᠮ᠃ ᠰᠢᠯᠦᠭ ᠲᠤ ᠦᠯᠦ ᠬᠠᠷᠠᠭᠳᠠᠬᠤ ᠬᠤᠶᠠᠷ ︽ᠬᠦᠦᠷᠨᠢᠭᠴᠢ︾ ᠪᠠᠶᠢᠳᠠᠭ᠃ ᠭᠡᠬᠦ ᠳᠤ ︽ᠪᠢ︾ ᠭᠤᠤᠯ ᠬᠦᠦᠷᠨᠢᠭᠴᠢ ᠶᠢᠨ ᠡᠭᠦᠷᠭᠡ ᠶᠢ ᠭᠦᠢᠴᠡᠳᠭᠡᠵᠦ᠂ ︽ᠴᠢ︾ ᠬᠦᠦᠷᠨᠢᠯ ᠢ ᠬᠦᠯᠢᠶᠡᠨ ᠠᠪᠤᠭᠴᠢ ᠪᠤᠶᠤ ᠨᠦᠬᠦᠨ ᠭᠦᠦᠷᠨᠢᠭᠴᠢ ᠶᠢᠨ ᠡᠭᠦᠷᠭᠡ ᠶᠢ ᠭᠦᠢᠴᠡᠳᠭᠡᠵᠦ ᠪᠠᠶᠢᠯ᠎ᠠ᠃ ᠡᠨᠡ ᠬᠤᠶᠠᠷ ︽ᠳᠡᠭᠷᠢ ᠶᠢᠨ ᠵᠤᠬᠢᠶᠠᠯ ᠭᠠᠵᠠᠷ ᠤᠨ ᠪᠠᠷᠢᠯᠳᠤᠯᠭ᠎ᠠ᠂ ᠠᠷᠭ᠎ᠠ ᠶᠢᠨ ᠠᠭᠤᠷ ᠪᠢᠯᠢᠭ ᠤᠨ ᠠᠮᠢᠰᠬᠤᠯ ᠢᠶᠠᠷ ᠠᠭᠤᠯᠵᠠᠭᠰᠠᠨ︾ ᠪᠦᠭᠡᠳ ︽ᠴᠢ︾ ᠭᠡᠵᠦ ︽ᠪᠢ︾ ᠶᠢᠨ      ︽ᠤᠷᠮ᠎ᠠ ᠰᠡᠳᠭᠢᠯᠬᠡ ᠶᠢᠨ ᠨᠤᠭᠤᠭᠠᠨ ᠨᠤᠭᠤᠰᠤ︾᠂ ︽ᠠᠯᠫᠠᠰ ᠤᠨ ᠴᠠᠰᠤ᠂ ᠭᠡᠭᠡᠷ᠎ᠡ ᠶᠢᠨ ᠳᠦᠳᠡᠭ︾᠂ ︽ᠳᠤᠮᠤᠭ ᠤᠨ ᠬᠡᠦᠬᠡᠨ᠂ ᠰᠠᠷᠠᠨ ᠤ ᠪᠦᠰᠡᠭᠦᠢ︾ ᠁ ᠪᠠᠶᠢᠵᠠᠢ᠃ ᠳᠡᠭᠡᠭᠦᠯᠡᠷ ︽ᠴᠢ︾ ︽ᠪᠢ︾ ᠭᠡᠵᠦ ᠨᠢᠬᠡ ᠬᠤᠤᠰ ᠢᠨᠠᠭ ᠬᠤᠩᠭᠤᠷ ᠮᠡᠳᠦ᠂ ᠳᠡᠶᠢᠮᠦ ᠪᠠᠶᠢᠵᠤ ᠪᠤᠯᠬᠤ ᠶᠤᠮ ︵ᠭᠡᠳᠡᠯ᠎ᠡ ᠦᠨᠡᠬᠡᠷ ᠳᠠᠰᠤ ᠭᠡᠯᠡᠵᠦ ᠴᠢᠳᠠᠬᠤ ᠦᠬᠡᠢ︶᠂ ᠳᠡᠭᠡᠬᠦ ᠳᠤ ᠡᠨᠡ ᠢᠨᠠᠭ ᠪᠤᠯᠤᠭᠰᠠᠨ ︽ᠴᠢ︾ ᠨᠢ ᠬᠡᠨ ᠪᠤᠢ︖ ᠶᠠᠭᠤ ᠪᠤᠢ︖ ᠬᠡᠨ ᠴᠦ ᠪᠠᠶᠢᠵᠤ ᠪᠤᠯᠤᠨ᠎ᠠ᠂ ᠶᠠᠭᠤ ᠴᠦ ᠪᠠᠶᠢᠵᠤ ᠪᠤᠯᠤᠨ᠎ᠠ᠃ ᠨᠡᠩ ᠴᠢᠬᠤᠯᠠ ᠨᠢ ᠰᠢᠯᠦᠭ ᠤᠨ ᠶᠠᠷᠦᠩᠬᠡᠢ ᠰᠠᠨᠠᠭ᠎ᠠ ᠳᠦᠷᠢ ᠪᠤᠯᠤᠭᠰᠠᠨ ︽ᠮᠦᠩᠬᠡ ᠶᠢᠨ ᠪᠤᠯᠵᠤᠮᠤᠷ︾ ᠨᠢ ᠪᠠᠶᠢᠭᠤᠰᠢᠳᠠᠢ᠃ ᠳᠡᠷᠡ ᠪᠤᠯᠵᠤᠮᠤᠷ ᠨᠢ ᠠᠷᠠᠢ ᠵᠦᠪᠬᠡᠨ ᠬᠦᠬᠡᠷᠦᠬᠦᠨ ᠬᠡᠦᠬᠡᠨ ᠭᠡᠵᠢ ᠤᠤ︖ ᠡᠰᠡᠭᠦᠯ᠎ᠡ ᠭᠦᠷᠦᠰᠢ ᠦᠬᠡᠢ ᠶᠢᠨ ᠬᠦᠰᠡᠯ ᠪᠤᠶᠤ ᠭᠦᠭᠡᠭᠡᠴᠡᠯᠳᠦᠯ ᠨᠢ ᠶᠤᠮ ᠤᠤ ︖ ᠪᠢ ᠯᠠ ᠮᠡᠳᠡᠬᠦ ᠦᠬᠡᠢ᠃ ᠭᠡᠷᠪᠡ ᠬᠡᠨ ᠶᠠᠭᠤ ᠭᠡᠳᠡᠭ ᠢ ᠨᠢ ᠮᠡᠳᠡᠴᠢᠭᠡᠭᠰᠡᠨ ᠪᠤᠯ ᠪᠢ ᠮᠦᠨ ᠠᠮᠳᠠᠷᠬᠠᠬᠤ ᠪᠠᠷ ᠦᠬᠡᠢ᠃ ᠠᠶᠢᠷᠯᠠᠨᠳ᠋ ᠤᠨ ᠵᠦᠴᠦᠭᠡ ︽ᠭᠤᠳᠤᠲ ᠢ ᠬᠦᠯᠢᠶᠡᠭᠰᠡᠨ︾ ᠳᠤ ᠬᠤᠶᠠᠷ ᠳᠡᠨᠦᠭᠦᠯᠴᠢ ᠮᠤᠷᠤᠢ ᠵᠠᠮ ᠳᠡᠭᠡᠷ᠎ᠡ᠂ ᠤᠳᠠ ᠮᠤᠳᠤᠨ ᠤ ᠳᠡᠷᠭᠡᠳᠡ ᠭᠤᠳᠤᠲ ᠢ ᠬᠦᠯᠢᠶᠡᠵᠦ ᠪᠠᠶᠢᠨ᠎ᠠ᠂ ᠵᠦᠴᠦᠭᠡ ᠳᠤ ᠦᠬᠡᠷ᠎ᠡ ᠤᠶᠢᠯᠠ ᠶᠠᠪᠤᠳᠠᠯ ᠦᠬᠡᠢ᠂ ᠭᠤᠳᠤᠲ ᠬᠡᠨ ᠪᠤᠢ᠂ ᠢᠷᠡᠨ᠎ᠡ ᠤᠤ ᠦᠬᠡᠢ ᠤᠤ᠂ ᠡᠨᠡ ᠬᠤᠶᠠᠷ ᠳᠡᠨᠦᠭᠦᠯᠴᠢ ᠶᠠᠭᠤᠨ ᠳᠤ ᠳᠡᠭᠦᠨ ᠢ ᠭᠦᠯᠢᠶᠡᠨ᠎ᠡ ᠭᠡᠳᠡᠭ ᠨᠢ ᠪᠦᠷ ᠦᠯᠦ ᠮᠡᠳᠡᠬᠦ ᠵᠦᠢᠯ᠃ ᠡᠨᠡ ᠵᠦᠴᠦᠭᠡ ᠶᠢ ᠤᠶᠢᠯᠠ ᠶᠠᠪᠤᠳᠠᠯ ᠤᠨ ᠤᠷᠠᠯᠢᠭ ᠢᠶᠠᠷ ᠰᠤᠨᠢᠷᠬᠠᠬᠤ ᠶᠢᠨ ᠠᠷᠭ᠎ᠠ ᠦᠬᠡᠢ᠂ ᠳᠡᠷᠡ ᠨᠢ ᠵᠦᠪᠬᠡᠨ ᠪᠡᠯᠭᠡᠳᠡᠯ᠃ ᠭᠤᠳᠤᠲ᠂ ᠬᠤᠶᠠᠷ ᠳᠡᠨᠦᠭᠦᠯᠴᠢᠨ᠂ ᠮᠤᠷᠤᠢ ᠵᠠᠮ᠂ ᠤᠳᠠ ᠮᠤᠳᠤ ᠪᠦᠷ ᠪᠡᠯᠭᠡᠳᠡᠯ ᠰᠠᠨᠠᠭ᠎ᠠ ᠳᠦᠷᠢ᠂ ︽ᠬᠦᠯᠢᠶᠡᠯᠳᠡ︾ ᠨᠢ ᠴᠦ ᠪᠡᠯᠭᠡᠳᠡᠯ᠃ ᠳᠡᠭᠡᠬᠦ ᠳᠤ ︽ᠭᠤᠳᠤᠲ ᠢ ᠬᠦᠯᠢᠶᠡᠭᠰᠡᠨ︾ ᠨᠢ ᠬᠠᠴᠢᠨ ᠬᠠᠭᠤᠮᠠᠬᠠᠢ᠂ ︽ᠨᠢᠰᠦᠨ ᠤᠳᠤᠭᠰᠠᠨ ᠪᠤᠯᠵᠤᠮᠤᠷ︾ ᠢᠷᠠᠭᠤ ᠰᠠᠶᠢᠬᠠᠨ᠃      ᠰᠢᠯᠦᠭ ᠲᠤ ᠪᠠᠰᠠ ᠮᠠᠰᠢ ᠤᠯᠠᠨ ᠪᠡᠯᠭᠡᠳᠡᠯ ᠰᠠᠨᠠᠭ᠎ᠠ ᠳᠦᠷᠢ ᠭᠠᠷᠳᠠᠭ᠃ ᠠᠪᠤᠷᠭᠤ ᠮᠤᠭᠠᠢ᠂ ᠨᠤᠭᠤᠭᠠᠨ ᠨᠤᠭᠤᠰᠤ᠂ ᠡᠷᠳᠡᠨ ᠤ ᠬᠤᠳᠡ ᠶᠢᠨ ᠪᠠᠭᠤᠷᠢ᠂ ᠰᠡᠯᠡᠭᠦᠨ ᠰᠠᠷᠠᠨ᠂ ᠰᠢᠷ᠎ᠠ ᠪᠦᠷᠦᠢ᠂ ᠬᠠᠷᠠᠩᠭᠤᠢ ᠰᠦᠨᠢ᠂ ᠦᠶᠡᠷ ᠤᠨ ᠤᠰᠤᠨ᠂ ᠭᠠᠯ ᠤᠯᠠᠭᠠᠨ ᠦᠨᠡᠭᠡ ᠁ ᠡᠳᠡᠭᠡᠷ ᠪᠤᠳᠠᠳᠠᠢ ᠳᠦᠷᠢ ᠨᠦᠭᠦᠳ ᠵᠤᠬᠢᠶᠠᠭᠴᠢ ᠶᠢᠨ ᠪᠠᠶᠢᠷᠢᠭᠤᠯᠤᠯ ᠢᠶᠠᠷ ᠰᠢᠯᠦᠭ ᠲᠤ ᠪᠦᠷ ᠤᠳᠬ᠎ᠠ ᠰᠢᠯᠵᠢᠭᠰᠡᠨ ᠪᠡᠯᠭᠡᠳᠡᠯ ᠰᠠᠨᠠᠭ᠎ᠠ ᠳᠦᠷᠢ ᠪᠤᠯᠵᠤ᠂ ᠵᠤᠬᠢᠶᠠᠭᠴᠢ ᠶᠢᠨ ᠠᠯᠢ ᠤᠯᠠᠨ ᠡᠴᠢᠨ᠎ᠡ ᠰᠠᠨᠠᠭ᠎ᠠ ᠪᠠᠨ ᠪᠢᠴᠢᠬᠦ ᠳᠤᠨᠢ ᠦᠢᠯᠡᠴᠢᠯᠡᠪᠡ᠃ ᠭᠡᠷᠪᠡ ᠪᠢ ᠦᠪᠡᠷ ᠤᠨ ᠭᠠᠭᠴᠠ ᠪᠤᠳᠤᠯ ᠢᠶᠠᠷ ᠡᠳᠡᠭᠡᠷ ᠰᠠᠨᠠᠭ᠎ᠠ ᠳᠦᠷᠢ ᠨᠦᠭᠦᠳ ᠢ ᠳᠠᠶᠢᠯᠪᠤᠷᠢᠯᠠᠬᠤ ᠪᠤᠯ ᠮᠠᠰᠢ ᠤᠷᠳᠤ ᠬᠠᠭᠤᠳᠠᠰᠤ ᠪᠠᠷ᠂ ᠮᠠᠰᠢ ᠤᠯᠠᠨ ᠳᠠᠯ᠎ᠠ ᠪᠠᠷ ᠶᠠᠷᠢᠵᠤ ᠪᠤᠯᠬᠤ ᠶᠤᠮ᠂ ᠭᠡᠳᠡᠯ᠎ᠡ ᠳᠡᠭᠡᠬᠦ ᠨᠢ ᠳᠡᠮᠡᠢ ᠠᠴᠢ ᠬᠤᠯᠪᠤᠭᠳᠠᠯ ᠦᠬᠡᠢ ᠰᠠᠨᠠᠭᠳᠠᠨ᠎ᠠ᠃ ᠤᠴᠢᠷ ᠨᠢ ᠡᠴᠢᠨ᠎ᠡ ᠪᠦᠷᠦᠭ ᠪᠦᠬᠡᠳ ᠤᠯᠠᠨ ᠰᠠᠨᠠᠭ᠎ᠠ ᠠᠬᠤᠭᠤᠯᠬᠤ ᠪᠤᠯ ᠰᠠᠨᠠᠭ᠎ᠠ ᠳᠦᠷᠢ ᠶᠢᠨ ᠭᠤᠤᠯ ᠴᠢᠳᠡᠪᠬᠢ ᠶᠤᠮ᠃ ᠳᠡᠭᠦᠨ ᠢ ᠳᠤᠶᠠᠴᠢᠭᠠᠳ ᠡᠨᠡ ᠳᠡᠷᠡ ᠭᠡᠬᠦ ᠨᠢ ᠭᠡᠳᠡᠷᠭᠦ ᠪᠠᠨ ᠳᠡᠭᠦᠨ ᠤ ᠤᠷᠠᠯᠢᠭ ᠤᠨ ᠭᠦᠴᠦᠨ ᠢ ᠪᠠᠭᠤᠷᠠᠭᠤᠯᠬᠤ ᠰᠠᠨ᠃ ᠢᠷᠠᠭᠤ ᠨᠠᠶᠢᠷᠠᠭ ᠪᠤᠯ ᠡᠴᠢᠨ᠎ᠡ ᠪᠦᠷᠦᠭ᠂ ᠡᠴᠢᠨ᠎ᠡ ᠪᠦᠷᠦᠭ ᠪᠤᠯ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠳᠡᠭᠡᠳᠦ ᠠᠬᠤᠢ᠃                                      ᠭᠤᠷᠪᠠ       ᠢᠷᠠᠭᠤ ᠨᠠᠶᠢᠷᠠᠭ ᠪᠤᠯ ᠭᠤᠸ᠎ᠠ ᠰᠠᠶᠢᠬᠠᠨ᠃ ︽ᠨᠢᠰᠦᠨ ᠤᠳᠤᠭᠰᠠᠨ ᠪᠤᠯᠵᠤᠮᠤᠷ︾ ᠪᠤᠯ ᠵᠤᠬᠢᠶᠠᠭᠴᠢ ᠶᠢᠨ ᠠᠮᠢᠳᠤᠷᠠᠯ ᠠᠴᠠ ᠳᠡᠭᠦᠭᠰᠡᠨ ᠭᠤᠸ᠎ᠠ ᠰᠠᠶᠢᠬᠠᠨ ᠤ ᠴᠡᠴᠡᠭᠡᠰ ᠤᠨ ᠪᠠᠭᠯᠠᠭ᠎ᠠ ᠪᠤᠶᠤ ᠶᠢᠷᠳᠢᠨᠴᠦ ᠶᠢᠨ ᠰᠠᠶᠢᠬᠠᠨ ᠳᠤ ᠬᠠᠨᠳᠤᠭᠰᠠᠨ ᠤᠷᠮ᠎ᠠ ᠰᠡᠳᠭᠢᠯᠬᠡ ᠶᠢᠨ ᠬᠢᠨᠢ ᠭᠠᠳᠠᠭᠰᠢᠯᠠᠯ ᠪᠤᠯᠬᠤ ᠶᠤᠮ᠃ ᠳᠤᠷᠤᠨᠠᠲ᠋ᠡᠭᠷᠢ ᠶᠢᠨ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠶᠡᠷᠦᠩᠬᠡᠢ ᠨᠢᠬᠡᠨ ᠤᠨᠴᠠᠯᠢᠭ ᠪᠤᠯ ᠨᠠᠮ ᠮᠦᠯᠢᠭᠦᠬᠡᠨ᠂ ᠶᠡᠭᠡ ᠬᠠᠶᠢᠷ᠎ᠠ ᠶᠢᠨ ᠳᠤᠭᠳᠤᠯᠤᠯ ᠢ ᠨᠠᠮ ᠵᠢᠮᠬᠡᠨ ᠳᠡᠮᠳᠡᠭᠯᠡᠳᠡᠭ ᠨᠢ ᠳᠡᠭᠦᠨ ᠤ ᠤᠭᠤᠭᠠᠳᠠ ᠶᠢᠨ ᠠᠷᠠᠨᠰᠢᠨ᠃ ᠳᠤᠰ ᠰᠢᠯᠢᠭ ᠨᠢ ᠴᠦ ᠰᠡᠳᠭᠢᠯᠬᠡ ᠶᠢᠨ ᠬᠦᠭ ᠤᠨ ᠵᠢᠭᠳᠡᠬᠡᠨ ᠴᠢᠪᠠᠭᠳᠠᠯ ᠢᠶᠠᠷ ᠨᠢᠬᠡ ᠵᠦᠢᠯ ᠤᠨ ᠨᠠᠮ ᠵᠢᠮ ᠤᠨ ᠭᠤᠸ᠎ᠠ ᠰᠠᠶᠢᠬᠠᠨ ᠢ ᠢᠷᠡᠨ ᠳᠡᠯᠭᠡᠳᠡᠭ᠃ ︽ᠨᠠᠢᠮᠠᠨ ᠭᠤᠤᠯ ᠤᠨ ᠡᠬᠢᠨ ᠳᠤ᠂ ᠨᠠᠶᠠᠨ ᠵᠢᠯᠠᠭ᠎ᠠ ᠶᠢᠨ ᠠᠭᠤᠯᠵᠠᠭᠤᠷ ᠲᠤ︾ ᠠᠭᠤᠯᠵᠠᠭᠰᠠᠨ ᠬᠤᠶᠠᠷ ᠬᠦᠮᠦᠨ ᠤᠷᠮ᠎ᠠ ᠰᠡᠳᠭᠢᠯᠬᠡ ᠶᠢᠨ ᠨᠠᠮ ᠵᠢᠮᠬᠡᠨ ᠠᠶᠠᠰ ᠢᠶᠠᠷ ᠳᠤᠮᠤᠭ ᠶᠠᠷᠢᠵᠤ᠂ ᠳᠡᠦᠬᠡ ᠭᠦᠦᠷᠨᠢᠨ᠂ ᠠᠯᠺᠰᠠᠨᠳᠠᠷ ᠪᠤᠶᠤ ᠠᠯᠬᠢᠨᠴᠢ ᠴᠡᠷᠢᠭ ᠤᠨ ᠠᠷᠪᠠᠳᠤ ᠶᠢᠨ ᠨᠤᠶᠠᠨ ᠬᠦᠷᠳᠡᠯ᠎ᠡ ᠬᠦᠦᠷᠨᠢᠵᠦ ᠪᠠᠶᠢᠭᠰᠠᠨ ᠴᠦ ᠪᠦᠬᠦ ᠰᠢᠯᠦᠭ ᠤᠨ ᠶᠡᠷᠦᠩᠬᠡᠢ ᠬᠦᠭ ᠠᠶᠠᠰ ᠨᠢᠬᠡ ᠯᠡ ᠬᠦᠭ ᠲᠡᠭᠡᠨ ᠨᠠᠮ ᠮᠦᠯᠢᠬᠦᠨ᠂ ᠵᠢᠭᠳᠡ ᠴᠤᠪᠤᠭᠤᠯᠢᠭ᠃ ᠨᠠᠮ ᠵᠢᠮ ᠪᠤᠯ ᠨᠢᠬᠡ ᠵᠦᠢᠯ ᠤᠨ ᠭᠤᠸ᠎ᠠ ᠰᠠᠶᠢᠬᠠᠨ᠂ ᠳᠡᠷᠡ ᠮᠦᠷᠳᠡᠭᠡᠨ ᠭᠤᠸ᠎ᠠ ᠰᠠᠶᠢᠬᠠᠨ ᠤ ᠳᠡᠭᠡᠳᠦ ᠠᠬᠤᠢ᠃ ᠬᠤᠷᠸ᠎ᠠ ᠳᠡᠯᠡᠬᠡᠢ ᠳᠦᠷᠬᠢᠷᠡᠬᠦ ᠳᠤ ᠠᠮᠠᠷᠠᠬᠠᠨ᠂ ᠨᠠᠮᠵᠢᠭᠤᠷᠠᠬᠤ ᠳᠤ ᠭᠦᠴᠢᠷ︔ ᠢᠷᠠᠭᠤ ᠨᠠᠶᠢᠷᠠᠭ ᠢᠭᠳᠦᠯᠡᠬᠦ ᠳᠤ ᠠᠮᠠᠷᠠᠬᠠᠨ᠂ ᠵᠢᠭᠳᠡᠷᠡᠬᠦ ᠳᠤ ᠬᠦᠴᠢᠷ ᠶᠤᠮ᠃      ︽ᠢᠷᠠᠭᠤ ᠨᠠᠶᠢᠷᠠᠭ ᠪᠤᠯ ᠳᠦᠰᠦᠭᠡᠯᠡᠬᠦᠢ ᠶᠢᠨ ᠤᠷᠠᠯᠢᠭ︾ ᠭᠡᠵᠦ ᠤᠷᠳᠤ ᠬᠤᠭᠤᠴᠠᠭ᠎ᠠ ᠪᠠᠷ ᠶᠠᠷᠢᠭᠰᠠᠭᠠᠷ ᠢᠷᠡᠪᠡ᠃ ᠠᠯᠢ ᠤᠷᠠᠯᠢᠭ ᠨᠢ ᠳᠦᠰᠦᠭᠡᠯᠡᠬᠦᠢ ᠶᠢᠨ ᠤᠷᠠᠯᠢᠭ ᠪᠢᠰᠢ ᠭᠡᠵᠦ ᠳ᠋ᠡ᠂ ᠵᠦᠪᠬᠡᠨ ᠢᠷᠡᠭᠤ ᠨᠠᠶᠢᠷᠠᠭ ᠲᠤ ᠳᠦᠰᠦᠭᠡᠯᠡᠬᠦᠢ ᠶᠢ ᠨᠡᠩ ᠱᠠᠭᠠᠷᠳᠠᠬᠤ ᠳᠡᠳᠦᠢ᠃ ᠳᠦᠰᠦᠭᠡᠯᠡᠬᠦᠢ ᠶᠢᠨ ᠤᠷᠠᠯᠢᠭ ᠭᠡᠵᠦ ᠪᠠᠶᠢᠭ᠎ᠠ ᠶᠢᠨ ᠨᠡᠩ ᠴᠢᠬᠤᠯᠠ ᠰᠢᠯᠳᠠᠭᠠᠨ ᠨᠢ ᠰᠠᠶᠢᠬᠠᠨ ᠪᠢᠴᠢᠭᠳᠡᠭᠰᠡᠨ ᠢᠷᠠᠭᠤ ᠨᠠᠶᠢᠷᠠᠭ ᠤᠩᠰᠢᠭᠴᠢ ᠶᠢᠨ ᠬᠢᠵᠠᠭᠠᠯᠠᠰᠢ ᠦᠬᠡᠢ ᠬᠤᠯᠪᠤᠨ ᠪᠤᠳᠤᠯᠳᠠ᠂ ᠤᠷᠠᠨ ᠰᠠᠨᠠᠭ᠎ᠠ ᠶᠢ ᠡᠭᠦᠰᠭᠡᠬᠦ ᠶᠢ ᠶᠠᠷᠢᠵᠤ ᠪᠤᠢ᠃ ᠡᠨᠡ ᠨᠢ ᠮᠦᠨ ᠴᠦ ᠰᠠᠶ᠋ᠢ ᠶᠢᠨ ᠶᠠᠷᠢᠭᠰᠠᠨ ︽ᠪᠠᠭᠳᠠᠭᠠᠮᠵᠢ︾ ᠪᠤᠶᠤ ︽ᠡᠰᠡ ᠳᠠᠭᠤᠰᠬᠤ ᠶᠢᠨ ᠤᠷᠠᠨ︾ ᠪᠤᠯᠤᠨ᠎ᠠ᠃ ︽ᠨᠢᠰᠦᠨ ᠤᠳᠤᠭᠰᠠᠨ ᠪᠤᠯᠵᠤᠮᠤᠷ︾ ᠤᠨ ᠤᠷᠠᠯᠢᠭ ᠤᠨ ᠴᠢᠬᠤᠯᠠ ᠨᠢᠬᠡᠨ ᠠᠮᠵᠢᠯᠳᠠ ᠭᠡᠪᠡᠯ᠂ ᠤᠩᠰᠢᠭᠴᠢ ᠶᠢ ᠳᠠᠰᠤᠷᠠᠯ ᠦᠬᠡᠢ ᠳᠦᠰᠦᠭᠡᠯᠡᠨ ᠪᠤᠳᠤᠬᠤ ᠶᠢᠨ ᠬᠤᠷᠸ᠎ᠠ ᠪᠠᠷ ᠳᠡᠨᠦᠬᠦᠴᠢᠯᠡᠭᠦᠯᠬᠦ ᠴᠢᠳᠠᠪᠬᠢ ᠳᠤᠨᠢ ᠪᠤᠢ᠃ ᠬᠠᠷᠠᠩᠭᠤᠢ ᠭᠡᠭᠡᠨ ᠤ ᠰᠤᠯᠪᠢᠴᠠᠯ᠂ ᠵᠡᠭᠦᠳᠦ ᠪᠠ ᠠᠬᠤᠢ ᠶᠢᠨ ᠰᠡᠯᠭᠦᠴᠡᠯ᠂ ᠳᠤᠮᠤᠭ ᠦᠨᠡᠨ ᠤ ᠳᠤᠭᠠᠴᠢᠯᠳᠠ᠂ ︽ᠳᠡᠭᠷᠢ ᠶᠢᠨ ᠬᠢᠵᠠᠭᠠᠷ ᠤᠨ ᠷᠤᠮᠠᠨᠲ᠋ᠢᠭ ᠦᠯᠢᠭᠡᠷ︾ ︽ᠲᠷᠦᠶᠠ︾ ︽ᠰᠠᠺᠤᠷᠠ︾ ︽ᠳᠠᠯᠠᠢ ᠶᠢᠨ ᠡᠷᠭᠢ ᠶᠢᠨ ᠡᠯᠡᠰᠦᠨ ᠰᠠᠶᠢᠷᠭᠠᠯ︾ ︽ᠡᠬᠡ ᠭᠠᠵᠠᠷ ᠤᠨ ᠠᠮᠠᠷᠠᠭ ᠬᠠᠳᠤᠨ︾ ᠁ ᠤᠩᠰᠢᠭᠴᠢ ᠳᠤ ᠳᠠᠩᠳᠠ ᠬᠤᠯᠪᠤᠨ ᠪᠤᠳᠤᠬᠤ ᠶᠢᠨ ᠤᠷᠤᠨ ᠵᠠᠢ ᠬᠠᠩᠭᠠᠵᠤ᠂ ᠤᠷᠠᠨ ᠪᠤᠳᠤᠯ ᠢ ᠨᠢ ᠠᠯᠤᠰ ᠳᠡᠰᠢ ᠳᠡᠭᠦᠯᠢᠭᠦᠯᠦᠨ᠎ᠡ᠃ ᠡᠨᠡ ᠪᠤᠯ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠭᠤᠸ᠎ᠠ ᠰᠠᠶᠢᠬᠠᠨ ᠤ ᠴᠢᠬᠤᠯᠠ ᠴᠢᠳᠠᠪᠬᠢ ᠪᠤᠯᠬᠤ ᠶᠤᠮ᠃       ᠡᠷᠳᠡᠮᠳᠡᠨ ᠳᠤᠷᠤᠨᠠᠲ᠋ᠡᠭᠷᠢ ᠳᠤ ︽ᠮᠦᠷᠦᠭᠡᠳᠦᠯ︾ ᠭᠡᠬᠦ ᠭᠤᠸ᠎ᠠ ᠰᠠᠶᠢᠬᠠᠨ ᠤ ᠵᠠᠩᠬᠢᠶ᠎ᠠ ᠪᠤᠢ᠂ ᠳᠡᠷᠡ ᠡᠷᠳᠡᠨ ᠤ ᠳᠡᠦᠬᠡ ᠪᠠ ᠦᠷᠦᠨᠡᠳᠡᠬᠢᠨ ᠤ ᠳᠤᠮᠤᠭ ᠠᠴᠠ ᠦᠪᠡᠷ ᠢ ᠪᠠᠨ ᠡᠷᠢᠬᠦ ᠳᠤᠷᠠᠳᠠᠢ᠃ ᠮᠦᠷᠦᠭᠡᠳᠦᠯ ᠨᠢ ᠳᠡᠭᠦᠨ ᠤ ᠰᠢᠯᠦᠭ ᠲᠤ ᠨᠦᠮᠵᠦᠭ ᠡᠭᠡᠭᠦᠨ ᠦᠨᠦᠷ ᠰᠠᠭᠤᠯᠭᠠᠵᠤ᠂ ᠭᠤᠶᠢᠳᠠ ᠠᠮᠳᠠᠳᠠᠢ ᠪᠤᠯᠭᠠᠵᠠᠢ᠃ ︽ᠠᠮᠳᠠ︾ ᠪᠤᠯ ᠤᠳᠬ᠎ᠠ ᠤᠷᠠᠯᠢᠭ ᠤᠨ ᠭᠤᠸ᠎ᠠ ᠰᠠᠶᠢᠬᠠᠨ ᠤ ᠴᠢᠬᠤᠯᠠ ᠡᠯᠧᠮᠧᠨᠲ᠂ ᠮᠦᠷᠦᠭᠡᠳᠦᠯ ᠢᠶᠠᠨ ᠠᠭᠰᠢᠭᠠᠵᠤ᠂ ᠢᠷᠠᠭᠤ ᠨᠠᠶᠢᠷᠠᠭ ᠢᠶᠠᠨ ᠠᠮᠳᠠᠰᠢᠭᠤᠯᠬᠤ ᠨᠢ ᠤᠷᠠᠯᠢᠭᠴᠢ ᠶᠢᠨ ᠢᠳᠡ ᠳᠡᠮᠢᠷ ᠪᠢᠯᠡ᠃ ︽ᠬᠠᠭᠤᠴᠢᠨ ᠪᠠᠭᠤᠷᠢ︾ ᠪᠤᠯ ︽ᠨᠢᠰᠦᠨ ᠤᠳᠤᠭᠰᠠᠨ ᠪᠤᠯᠵᠤᠮᠤᠷ︾ ᠲᠠᠬᠢ ᠴᠢᠬᠤᠯᠠ ᠨᠢᠬᠡᠨ ᠰᠠᠨᠠᠭ᠎ᠠ ᠳᠦᠷᠢ᠂ ᠮᠦᠨ ᠴᠦ ᠲᠤᠷᠤᠨᠠᠲ᠋ᠡᠭᠷᠢ ᠶᠢᠨ ᠤᠯᠠᠩᠬᠢ ᠰᠢᠯᠦᠭ ᠲᠤ ᠭᠠᠷᠳᠠᠭ ᠰᠠᠨᠠᠭ᠎ᠠ ᠳᠦᠷᠢ᠃ ᠬᠦᠨ ᠰᠠᠨᠠᠭ᠎ᠠ ᠠᠬᠤᠭᠤᠯᠤᠭᠰᠠᠨ ᠡᠨᠡ ᠰᠠᠨᠠᠭ᠎ᠠ ᠳᠦᠷᠢ ᠨᠢ ᠵᠤᠬᠢᠶᠠᠭᠴᠢ ᠶᠢᠨ ᠳᠡᠦᠬᠡᠨ ᠮᠦᠷᠦᠭᠡᠳᠦᠯ ᠢ ᠨᠡᠶᠢᠳᠭᠡᠵᠦ᠂ ᠰᠢᠯᠦᠭ ᠤᠨ ᠭᠤᠸ᠎ᠠ ᠰᠠᠶᠢᠬᠠᠨ ᠤ ᠦᠨ᠎ᠡ ᠴᠡᠨ᠎ᠡ ᠶᠢ ᠵᠤᠵᠠᠭᠠᠳᠬᠠᠵᠠᠢ᠃ ᠨᠠᠮ ᠵᠢᠮᠬᠡᠨ ︽ᠨᠢᠰᠦᠨ ᠤᠳᠤᠭᠰᠠᠨ ᠪᠤᠯᠵᠤᠮᠤᠷ︾ ᠲᠤ ᠵᠤᠬᠢᠶᠠᠭᠴᠢ ᠶᠢᠨ ᠶᠢᠷᠳᠢᠨᠴᠦ ᠶᠢᠨ ᠰᠠᠶᠢᠬᠠᠨ ᠳᠤ ᠬᠠᠨᠳᠤᠭᠰᠠᠨ ᠳᠤᠭᠳᠤᠯᠤᠭᠰᠠᠨ ᠬᠠᠶᠢᠷ᠎ᠠ ᠨᠢᠭᠤᠭᠳᠠᠵᠤ ᠪᠤᠢ᠃ ︽ᠶᠢᠷᠳᠢᠨᠴᠦ ᠶᠢᠨ ᠭᠡᠷᠡᠯ᠂ ᠴᠡᠩᠭᠡᠯ ᠤᠨ ᠪᠤᠯᠠᠭ᠂ ᠪᠠᠶᠠᠰᠬᠤᠯᠠᠩ ᠤᠨ ᠳᠠᠭᠤᠤ︾ ᠵᠡᠷᠭᠡ ᠳᠦᠷᠰᠦᠯᠡᠯ ᠪᠤᠯ ᠬᠦᠮᠦᠨ ᠤ ᠰᠠᠶᠢᠬᠠᠨ ᠳᠤ ᠬᠠᠨᠳᠤᠭᠰᠠᠨ ᠳᠡᠭᠡᠳᠦ ᠬᠡᠮᠵᠢᠶᠡᠨ ᠤ ᠦᠨᠡᠯᠡᠯᠳᠡ ᠳᠠᠭᠠᠰᠢᠶᠠᠯ ᠪᠤᠯᠬᠤ ᠶᠤᠮ᠃ ᠭᠦᠭᠵᠢᠮᠳᠦ ᠬᠡᠯᠡᠯᠬᠡ ᠪᠤᠯ ︽ᠨᠢᠰᠦᠨ ᠤᠳᠤᠭᠰᠠᠨ ᠪᠤᠯᠵᠤᠮᠤᠷ︾ ᠤᠨ ᠭᠤᠸ᠎ᠠ ᠰᠠᠶᠢᠬᠠᠨ ᠤ ᠪᠠᠰᠠ ᠨᠢᠬᠡ ᠴᠢᠬᠤᠯᠠ ᠠᠬᠤᠭᠤᠯᠬᠤᠨ᠃ ︽ᠰᠡᠯᠡᠭᠦᠨ ᠰᠠᠷᠠᠨ ᠭᠦᠪᠪᠦᠨ ᠢᠷᠡᠨ᠎ᠡ᠂ ᠰᠡᠪᠡᠭᠡᠨᠡᠨ ᠰᠡᠩᠰᠡᠷᠡᠬᠦ ᠬᠤᠷ᠎ᠠ ᠶᠢᠨ ᠤᠰᠤᠨ ᠪᠦᠵᠢᠭᠯᠡᠨ ᠢᠷᠡᠨ᠎ᠡ︾᠂ ︽ᠭᠡᠭᠡᠪᠴᠢ ᠶᠢᠨ ᠴᠡᠩᠭᠡᠷ ᠱᠠ ᠳᠡᠭᠡᠷ᠎ᠡ ᠪᠤᠯᠤᠷᠬᠠᠨ ᠮᠦᠰᠢᠶᠡᠳᠦ ᠴᠢᠨᠢ ᠬᠡᠦᠬᠡᠳ ᠰᠢᠭ ᠳᠤᠭᠯᠠᠵᠤ ᠪᠠᠶᠢᠯ᠎ᠠ︾ ᠁ ᠵᠡᠷᠭᠡ ᠶᠢᠨ ᠬᠡᠯᠡᠯᠬᠡ ᠨᠦᠭᠦᠳ ᠳᠤᠰ ᠰᠢᠯᠦᠭ ᠢ ᠦᠨᠡᠬᠡᠷ ᠦᠪᠡᠷᠮᠢᠴᠡ ᠭᠤᠪᠠᠶᠢᠷᠬᠠᠨ ᠪᠤᠯᠭᠠᠯ᠎ᠠ ᠭᠡᠳᠡᠭ ᠢ ᠵᠠᠪᠠᠯ ᠳᠡᠮᠳᠡᠭᠯᠡᠬᠦ ᠭᠡᠷᠡᠭᠳᠡᠢ ᠰᠢᠦ᠃       ᠤᠳᠬ᠎ᠠ ᠤᠶᠠᠩᠭ᠎ᠠ ᠶᠢᠨ ᠦᠯᠡᠮᠵᠢ ᠢᠨᠦ ᠡᠰᠡ ᠳᠠᠭᠤᠰᠬᠤ ᠶᠢᠨ ᠤᠷᠠᠨ ᠪᠤᠯᠠᠢ᠂ ᠤᠳᠬ᠎ᠠ ᠤᠶᠠᠩᠭ᠎ᠠ ᠳᠤᠷ ᠡᠰᠡ ᠳᠠᠭᠤᠰᠬᠤ ᠠᠨᠤ ᠤᠭᠤᠭᠠᠳᠠ ᠶᠢᠨ ᠭᠤᠸ᠎ᠠ ᠰᠠᠶᠢᠬᠠᠨ᠃ ᠢᠷᠡᠯᠳᠠ᠄ ᠲᠤᠮᠳᠠᠳᠦ ᠤᠯᠤᠰ ᠤᠨ ᠮᠤᠩᠭᠤᠯ ᠬᠡᠯᠡᠨ ᠤ ᠰᠤᠨᠢᠨ ᠮᠡᠳᠡᠭᠡ ᠶᠢᠨ ᠰᠦᠯᠵᠢᠶ᠎ᠠ ᠲᠡᠪᠰᠢᠭᠦᠯᠦᠭᠰᠡᠨ ᠨᠢ᠄ ᠤᠶᠠᠬᠠᠨ
  
ᠢᠷᠡᠯᠲᠡ᠄ ᠲᠤᠮᠳᠠᠳᠦ ᠤᠯᠤᠰ ᠤᠨ ᠮᠤᠩᠭᠤᠯ ᠬᠡᠯᠡᠨ ᠤ ᠰᠤᠨᠢᠨ ᠮᠡᠳᠡᠭᠡ ᠶᠢᠨ ᠰᠦᠯᠵᠢᠶ᠎ᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠰᠤᠶᠤᠯ ᠤᠨ ᠨᠠᠨᠳᠢᠨ ᠦᠪ ᠪᠤᠯᠬᠤ ᠬᠡᠰᠡᠷ ᠰᠤᠳᠤᠯᠤᠯ ᠤᠨ ᠳᠤᠬᠠᠢ
ᠨᠡᠶᠢᠭᠡᠮ ᠤᠨ ᠬᠤᠪᠢᠰᠣᠯᠳᠠ ᠲᠣᠮᠳᠠᠬᠢ ᠴᠦᠬᠡᠨ ᠲᠣᠭᠠᠳᠣ ᠦᠨᠳᠦᠰᠦᠳᠡᠨ ᠤ ᠣᠷᠠᠨ ᠵᠣᠬᠢᠶᠠᠯ ᠤᠨ ᠬᠦᠭᠵᠢᠯᠲᠡ
ᠮᠣᠩᠭᠤᠯ ᠰᠣᠶᠣᠯ ᠤᠨ ᠲᠦᠯᠦᠭᠡᠯᠡᠬᠦ ᠴᠢᠨᠠᠷᠲᠠᠢ ᠨᠣᠮ ᠪᠢᠴᠢᠭ
ᠤᠳᠬ᠎ᠠ ᠣᠷᠠᠯᠢᠭ ᠴᠡᠴᠡᠭᠯᠡᠨ ᠬᠦᠭᠵᠢᠭᠰᠡᠨ ᠰᠢᠨ᠎ᠡ ᠴᠠᠭ ᠦᠶ᠎ᠡ ᠶᠢ ᠤᠭᠳᠤᠨ ᠠᠪᠴᠢᠷᠠᠯ᠎ᠠ
ᠣᠷᠴᠢᠭᠤᠯᠭ᠎ᠠ ᠶᠢᠨ ᠵᠣᠬᠢᠶᠠᠯ ᠪᠠ ᠣᠯᠠᠨ ᠤ ᠬᠦᠷᠳᠡᠭᠡᠯ
2014-2019 ©  ᠮᠦᠩᠭᠡᠭᠠᠯ ᠮᠣᠩᠭᠤᠯ ᠰᠣᠶᠣᠯ ᠤᠨ ᠠᠵᠣ ᠠᠬᠤᠶᠢᠯᠠᠯ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备11000440号-2