ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠳᠦᠷᠪᠡᠳ ᠰᠤᠨᠢᠷᠬᠠᠯ
ᠡᠷᠳᠡᠮ ᠰᠢᠨᠵᠢᠯᠡᠬᠡᠨ ᠤ ᠦᠬᠦᠯᠡᠯ ᠬᠢᠭᠡᠳ ᠨᠠᠶᠢᠷᠠᠭᠤᠯᠤᠯ ᠤᠨ ᠤᠷᠭᠠᠨᠢᠭ ᠤᠶᠠᠯᠳᠦᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/12/18
      — ᠮᠢᠩᠭᠠᠳ ᠡᠷᠳᠡᠮᠲᠦ ᠶᠢᠨ ︽ᠶᠢᠷᠳᠢᠨᠴᠦ ᠶᠢᠨ ᠬᠢᠵᠠᠭᠠᠷ ᠲᠠᠬᠢ ᠰᠠᠷᠠᠨ ᠤ ᠭᠡᠷᠡᠯ︾ ᠨᠣᠮ ᠢ ᠲᠠᠶᠢᠯᠪᠤᠷᠢᠯᠠᠨ ᠣᠩᠰᠢᠬᠤ ᠨᠢ       ᠫᠷᠣᠹᠧᠰᠰᠣᠷ᠂ ᠳ᠋ᠣᠺᠲ᠋ᠣᠷ᠂ ᠵᠣᠬᠢᠶᠠᠯᠴᠢ ᠮᠢᠩᠭᠠᠳ ᠡᠷᠳᠡᠮᠳᠣ ᠶᠢᠨ ︽ᠶᠢᠷᠳᠢᠨᠴᠣ ᠶᠢᠨ ᠬᠢᠵᠠᠭᠠᠷ ᠲᠠᠬᠢ ᠰᠠᠷᠠᠨ ᠤ ᠭᠡᠷᠡᠯ︾ ᠨᠣᠮ ᠨᠢ ᠠᠮᠠᠨ ᠲᠡᠦᠬᠡ ᠶᠢ ᠪᠢᠴᠢᠭᠰᠡᠨ ︽ᠵᠠᠭᠤᠨ ᠠᠴᠠ ᠴᠦ ᠣᠷᠳᠣ ᠭᠡᠳᠡᠩ ᠤᠨ ᠰᠦᠨᠢ︾᠂ ᠠᠮᠠᠨ ᠰᠣᠶᠣᠯ ᠪᠠ ᠪᠢᠴᠢᠭ ᠤᠨ ᠰᠣᠶᠣᠯ ᠢ ᠪᠢᠴᠢᠭᠰᠡᠨ ︽ᠬᠠᠮᠤᠭ ᠤᠨ ᠰᠡᠭᠦᠯᠴᠢ ᠶᠢᠨ ᠮᠠᠭᠳᠠᠭᠠᠯ ᠬᠠᠶᠢᠯᠠᠭᠴᠢ︾᠂ ᠨᠣᠮ ᠬᠠᠳᠠᠭᠠᠯᠠᠳᠠᠭ ᠣᠯᠠᠮᠵᠢᠯᠠᠯ ᠢ ᠪᠢᠴᠢᠭᠰᠡᠨ ︽ᠰᠢᠪᠡᠷ ᠬᠡᠷᠡᠮ ᠤᠨ ᠲᠣᠳᠣᠷ᠎ᠠ ᠠᠰᠠᠭᠰᠠᠨ ᠵᠣᠯᠠ ᠶᠢᠨ ᠭᠡᠷᠡᠯ︾ ᠪᠠ ᠦᠰᠦᠭ ᠪᠢᠴᠢᠭ ᠤᠨ ᠲᠡᠦᠬᠡ ᠶᠢ ᠪᠢᠴᠢᠭᠰᠡᠨ ︽ᠲᠣᠳᠣᠷᠬᠠᠢ ᠦᠰᠦᠭ︾ ᠵᠡᠷᠭᠡ ᠲᠦᠷᠪᠡᠨ ᠨᠠᠶᠢᠷᠠᠭᠤᠯᠣᠯ ᠢᠶᠠᠷ ᠪᠦᠷᠢᠯᠳᠦᠪᠠ᠃ ︽ᠵᠠᠭᠤᠨ ᠠᠴᠠ ᠴᠦ ᠣᠷᠳᠣ ᠭᠡᠳᠡᠩ ᠤᠨ ᠰᠦᠨᠢ︾᠂ ︽ᠬᠠᠮᠤᠭ ᠰᠡᠬᠦᠯᠴᠢ ᠶᠢᠨ ᠮᠠᠭᠳᠠᠭᠠᠯ ᠬᠠᠶᠢᠯᠠᠭᠴᠢ︾᠂ ︽ᠰᠢᠪᠠᠷ ᠬᠡᠷᠡᠮ ᠤᠨ ᠲᠣᠳᠣᠷ᠎ᠠ ᠠᠰᠠᠭᠰᠠᠨ ᠵᠣᠯᠠ ᠶᠢᠨ ᠭᠡᠷᠡᠯ︾ ᠭᠤᠷᠪᠠᠨ ᠵᠣᠬᠢᠶᠠᠯ ᠠᠩᠬ᠎ᠠ ︽ᠠᠷᠠᠳ ᠤᠨ ᠰᠦᠯᠵᠢᠶ᠎ᠠ︾ ᠳᠤ ᠨᠡᠶᠢᠳᠡᠯᠡᠭᠳᠡᠨ ᠣᠩᠰᠢᠭᠴᠢ ᠶᠢᠨ ᠬᠠᠷᠠᠭᠠᠨ ᠳᠤ ᠣᠷᠣᠵᠦ᠂ ᠲᠠᠷᠠᠭ᠎ᠠ ᠨᠢ ︽ᠰᠢᠯᠢ ᠶᠢᠨ ᠭᠤᠣᠯ︾ ᠰᠡᠳᠬᠦᠯ ᠳᠤ ᠨᠡᠶᠢᠳᠡᠯᠡᠭᠳᠡᠵᠦ᠂ ᠣᠳᠠᠯ ᠦᠬᠡᠢ ︽ᠦᠨᠢᠷ ᠴᠡᠴᠡᠭ︾ ᠰᠡᠳᠬᠦᠯ ᠪᠠ ︽ᠦᠨᠳᠣᠰᠣᠳᠠᠨ ᠤ ᠣᠳᠬ᠎ᠠ ᠵᠣᠬᠢᠶᠠᠯ︾ ᠰᠡᠳᠬᠦᠯ ᠳᠤ ᠰᠢᠯᠵᠢᠬᠦᠯᠦᠨ ᠨᠡᠶᠢᠳᠡᠯᠡᠭᠳᠡᠵᠦ᠂ ᠣᠯᠠᠨ ᠤ ᠲᠣᠮᠳᠠ ᠲᠣᠩ ᠶᠡᠭᠡ ᠨᠦᠯᠦᠬᠡ ᠲᠣᠰᠬᠠᠯ ᠭᠠᠷᠣᠭᠰᠠᠨ ᠪᠦᠬᠡᠳ ︽ᠵᠠᠭᠤᠨ ᠠᠴᠠ ᠴᠦ ᠣᠷᠳᠣ ᠭᠡᠳᠡᠩ ᠤᠨ ᠰᠦᠨᠢ︾ ᠪᠠ ︽ᠬᠠᠮᠤᠭ ᠤᠨ ᠰᠡᠭᠦᠯᠴᠢ ᠶᠢᠨ ᠮᠠᠭᠳᠠᠭᠠᠯ ᠬᠠᠶᠢᠯᠠᠭᠴᠢ︾ ᠬᠤᠶᠠᠷ ᠨᠠᠶᠢᠷᠠᠭᠤᠯᠣᠯ ᠨᠢ 2012 ᠣᠨ ᠤ 7 ᠳ᠋ᠣᠭᠠᠷ ᠰᠠᠷ᠎ᠠ ᠳᠤ ᠲᠣᠯᠣᠳᠣᠭᠠᠷ ᠣᠳᠠᠭᠠᠨ ᠤ ︽ᠪᠣᠷᠵᠢᠭᠢᠨ︾ ᠣᠳᠬ᠎ᠠ ᠵᠣᠬᠢᠶᠠᠯ ᠤᠨ ᠱᠠᠩᠨᠠᠯ ᠤᠨ ᠲᠡᠷᠢᠭᠦᠨ ᠱᠠᠩᠨᠠᠯ᠂ 2013 ᠣᠨ ᠳᠤ ︽ᠦᠨᠳᠦᠰᠦᠳᠡᠨ ᠤ ᠣᠳᠬ᠎ᠠ ᠵᠣᠬᠢᠶᠠᠯ︾ ᠰᠡᠳᠬᠦᠯ ᠤᠨ ᠣᠨ ᠤ ᠱᠠᠩᠨᠠᠯ ᠢ ᠲᠣᠰ ᠲᠣᠰ ᠬᠦᠷᠳᠡᠵᠦ᠂ ︽ᠲᠣᠳᠣᠷᠬᠠᠢ ᠦᠰᠦᠭ︾ ᠵᠣᠬᠢᠶᠠᠯ ᠨᠢ ︽ᠲᠣᠮᠳᠠᠳᠣ ᠶᠢᠨ ᠦᠨᠳᠣᠰᠣᠳᠠᠨ︾ ᠰᠡᠳᠬᠦᠯ ᠳᠤ ᠭᠤᠷᠪᠠᠨ ᠬᠤᠭᠤᠴᠠᠭ᠎ᠠ ᠦᠷᠬᠦᠯᠵᠢᠯᠡᠨ ᠨᠡᠶᠢᠳᠡᠯᠡᠭᠳᠡᠵᠦ᠂ ᠲᠠᠷᠠᠭ᠎ᠠ ᠨᠢ ︽ᠲᠣᠮᠳᠠᠳᠣ ᠣᠯᠣᠰ ᠤᠨ ᠮᠣᠩᠭᠤᠯ ᠭᠡᠯᠡᠨ ᠤ ᠰᠣᠨᠢᠨ ᠮᠡᠳᠡᠬᠡᠨ ᠤ ᠰᠦᠯᠵᠢᠶ᠎ᠠ︾ ᠪᠠ ︽ᠬᠤᠯᠪᠤᠭ᠎ᠠ ᠰᠦᠯᠵᠢᠶ᠎ᠡ︾ ᠵᠡᠷᠭᠡ ᠰᠦᠯᠵᠢᠶ᠎ᠡ ᠪᠠᠷ ᠲᠠᠷᠬᠠᠭᠰᠠᠨ ᠪᠠᠶᠢᠨ᠎ᠠ᠃ ︽ᠶᠢᠷᠳᠢᠨᠴᠣ ᠶᠢᠨ ᠬᠢᠵᠠᠭᠠᠷ ᠲᠠᠬᠢ ᠰᠠᠷᠠᠨ ᠤ ᠭᠡᠷᠡᠯ︾ ᠨᠣᠮ 2014 ᠣᠨ ᠤ 5 ᠰᠠᠷ᠎ᠠ ᠳᠤ ᠦᠪᠤᠷ ᠮᠣᠩᠭᠤᠯ ᠤᠨ ᠰᠣᠶᠣᠯ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ ᠠᠴᠠ ᠬᠡᠪᠯᠡᠭᠳᠡᠨ ᠭᠠᠷᠣᠮᠠᠭᠴᠠ ᠪᠠᠨ ᠪᠤᠷᠣᠯᠠᠭᠤᠯᠭ᠎ᠠ ᠰᠠᠶᠢᠳᠠᠢ ᠨᠣᠮ ᠪᠤᠯᠵᠦ᠂ 2000 ᠰᠢᠷᠬᠡᠭ ᠬᠡᠪᠯᠡᠭᠳᠡᠭᠰᠡᠨ ᠨᠣᠮ ᠨᠢ ᠬᠤᠳᠠᠯᠳᠣᠵᠦ ᠲᠠᠭᠤᠰᠣᠮᠠᠷ ᠪᠤᠯᠪᠠ᠃ ᠡᠨᠡ ᠶᠡᠭᠡ ᠨᠦᠯᠦᠬᠡ ᠲᠣᠰᠬᠠᠯ ᠪᠠ ᠠᠮᠵᠢᠯᠳᠠ ᠠᠴᠠ ᠲᠣᠰ ᠨᠣᠮ ᠤᠨ ᠦᠨ᠎ᠡ ᠴᠡᠨ᠎ᠡ ᠨᠢ ᠮᠡᠳᠡᠷᠡᠭᠳᠡᠵᠦ ᠪᠠᠶᠢᠨ᠎ᠠ᠃ ᠲᠡᠭᠡᠪᠡᠯ ᠴᠣᠬᠤᠮ ᠶᠠᠮᠠᠷ ᠰᠢᠯᠳᠠᠭᠠᠨ ᠢᠶᠠᠷ ᠲᠣᠰ ᠨᠣᠮ ᠲᠡᠳᠣᠢ ᠶᠡᠭᠡ ᠣᠩᠰᠢᠭᠴᠢ ᠶᠢᠨ ᠠᠩᠬᠠᠷᠣᠯ ᠢ ᠲᠠᠳᠠᠪᠠ︖ ︽ᠨᠢᠭᠤᠴᠠ ᠵᠣᠷ︾ ᠨᠢ ᠶᠠᠭᠤ ᠪᠠᠶᠢᠭ᠎ᠠ ᠪᠤᠢ︖ ᠦᠬᠦᠯᠡᠯ ᠲᠣᠭᠤᠷᠪᠢᠭᠴᠢ ᠪᠠᠷ ᠦᠨᠡᠨᠴᠢ ᠰᠡᠳᠬᠢᠯᠬᠡ ᠶᠢ ᠦᠪᠡᠷᠮᠢᠴᠠ ᠭᠤᠶᠢᠳᠠ ᠢᠯᠡᠷᠡᠬᠦᠯᠵᠦ ᠴᠢᠳᠠᠭᠰᠠᠨ︔ ᠨᠠᠶᠢᠷᠠᠭᠤᠯᠣᠯ ᠤᠨ ᠬᠡᠯᠪᠡᠷᠢ ᠮᠠᠶ᠋ᠢᠭ ᠢ ᠲᠡᠯᠡᠵᠦ᠂ ᠬᠦᠷᠢᠶ᠎ᠡ ᠬᠡᠪᠴᠢᠶ᠎ᠠ ᠶᠢ ᠦᠷᠭᠡᠳᠭᠡᠭᠰᠡᠨ ᠵᠡᠷᠬᠡ ᠲᠠᠯ᠎ᠠ ᠠᠴᠠ ᠲᠣᠰ ᠨᠣᠮ ᠤᠨ ᠣᠯᠠᠨ ᠤ ᠠᠩᠬᠠᠷᠣᠯ ᠢ ᠲᠠᠳᠠᠵᠦ ᠴᠢᠳᠠᠭᠰᠠᠨ ᠤ ︽ᠨᠢᠭᠤᠴᠠ ᠵᠣᠷ︾ ᠢ ᠵᠠᠳᠠᠯᠣᠨ ᠰᠢᠨᠵᠢᠯᠡᠬᠦ ᠶᠢ ᠣᠷᠣᠯᠳᠣᠪᠠ᠃      ᠨᠢᠬᠡ᠂ ᠦᠨᠡᠨᠴᠢ ᠰᠡᠳᠬᠢᠯᠬᠡ᠂ ᠦᠪᠡᠷᠮᠢᠴᠠ ᠢᠯᠡᠷᠡᠬᠦᠯᠦᠯ      ᠲᠣᠰ ᠨᠣᠮ ᠳᠤ ᠪᠠᠭᠳᠠᠯᠴᠠᠭᠰᠠᠨ ᠨᠠᠶᠢᠷᠠᠭᠤᠯᠣᠯ ᠤᠳ ᠲᠤ ᠵᠤᠬᠢᠶᠠᠯᠴᠢ ᠶᠢᠨ ᠪᠠᠶᠠᠷᠯᠠᠭᠰᠠᠨ᠂ ᠭᠤᠮᠣᠳᠠᠭᠰᠠᠨ᠂ ᠬᠠᠷᠠᠮᠰᠠᠭᠰᠠᠨ᠂ ᠪᠢᠰᠢᠷᠡᠭᠰᠡᠨ᠂ ᠵᠣᠷᠢᠭᠵᠢᠬᠰᠡᠨ᠂ ᠬᠤᠷᠣᠰᠦᠨ ᠬᠢᠯᠢᠩᠨᠡᠭᠰᠡᠨ ᠣᠯᠠᠨ ᠵᠦᠢᠯ ᠤᠨ ᠰᠡᠳᠬᠢᠯᠬᠡ ᠨᠡᠶᠢᠳᠡᠮ ᠯᠡᠪᠡᠷᠡᠵᠦ ᠪᠠᠶᠢᠳᠠᠭ᠃ ᠡᠨᠡ ᠨᠢ ᠣᠩᠰᠢᠭᠴᠢ ᠶᠢ ᠬᠦᠨ ᠨᠦᠯᠦᠬᠡᠯᠡᠭᠰᠡᠨ ᠤ ᠨᠢᠬᠡ ᠰᠢᠯᠳᠠᠭᠠᠨ ᠭᠡᠵᠦ ᠮᠢᠨᠦ ᠬᠤᠪᠢ ᠳᠤ ᠪᠤᠳᠣᠳᠠᠭ᠃ ᠨᠠᠶᠢᠷᠠᠭᠤᠯᠣᠯ ᠤᠨ ᠦᠭᠡᠷ᠎ᠡ ᠲᠦᠷᠦᠯ ᠤᠨ ᠵᠣᠬᠢᠶᠠᠯ ᠠᠴᠠ ᠢᠯᠭᠠᠭᠳᠠᠬᠤ ᠢᠯᠡᠷᠬᠡᠢ ᠣᠨᠴᠠᠯᠢᠭ ᠪᠤᠯ ᠲᠠᠷᠣᠢ ᠰᠡᠳᠬᠢᠯᠬᠡ ᠪᠠᠷ ᠣᠩᠰᠢᠭᠴᠢ ᠶᠢ ᠨᠦᠯᠦᠬᠡᠯᠡᠬᠦ ᠶᠠᠪᠤᠳᠠᠯ ᠪᠤᠯᠤᠨ᠎ᠠ᠃ ᠨᠣᠮ ᠰᠣᠳᠣᠷ ᠢ ᠪᠤᠷᠬᠠᠨ ᠰᠢᠭ᠋ ᠲᠡᠬᠡᠳᠣᠯᠡᠳᠡᠭ ᠮᠣᠩᠭᠤᠯ ᠰᠣᠶᠣᠯ ᠳᠠᠭᠠᠨ ᠬᠠᠶᠢᠷᠠᠳᠠᠢ ᠦᠬᠡᠯᠡᠳ ᠠᠷᠠᠳ ᠲᠦᠮᠠᠨ ᠲᠠᠢ ᠠᠭᠤᠯᠵᠠᠵᠦ ᠶᠠᠷᠢᠯᠴᠠᠭᠠᠳ᠂ ᠪᠠᠭ᠋ᠠᠳᠣᠨ ᠪᠢᠰᠢᠷᠡᠭᠰᠡᠨ᠂ ᠬᠦᠨᠳᠣᠳᠬᠡᠭᠰᠡᠨ ᠰᠡᠳᠬᠢᠯᠬᠡ ᠡᠷᠬᠡ ᠦᠬᠡᠢ ᠲᠦᠷᠦᠭᠳᠡᠭᠰᠡᠨ ᠵᠣᠬᠢᠶᠠᠭᠴᠢ ᠪᠠᠷ ︽ᠦᠪᠡᠷ ᠤᠨ ᠢᠶᠠᠨ ᠰᠣᠶᠣᠯ ᠲᠡᠦᠬᠡ ᠪᠠᠨ ᠬᠢᠮᠠᠭᠠᠳᠠᠨ ᠬᠠᠳᠠᠭᠠᠯᠠᠵᠦ ᠶᠠᠪᠤᠳᠠᠭ ᠬᠦᠮᠦᠰ ᠡᠬᠡ ᠨᠣᠳᠤᠭ ᠤᠨ ᠢᠶᠠᠨ ᠠᠳᠬᠤ ᠰᠢᠷᠣᠢ᠂ ᠠᠯᠳᠠᠨ ᠬᠢᠯᠢ ᠶᠢ ᠬᠠᠯᠠᠭᠤᠨ ᠠᠮᠢ ᠪᠠᠷ ᠢᠶᠠᠨ ᠬᠠᠭᠡᠴᠨᠶᠢᠯᠠᠳᠠᠭ ᠡᠬᠡ ᠣᠷᠣᠨᠴᠢ ᠲᠠᠶᠢᠴᠢᠳ ᠲᠠᠢ ᠢᠯᠭᠠᠭ᠎ᠠ ᠦᠬᠡᠢ ᠢᠵᠢᠯᠢᠬᠡᠨ ᠬᠠᠳᠠᠨ ᠪᠠᠭᠠᠳᠣᠷᠴᠣᠳ︾ ᠭᠡᠵᠦ ᠬᠦᠨᠳᠣᠳᠬᠡᠨ ᠪᠢᠰᠢᠷᠡᠭᠰᠡᠨ ᠪᠦᠬᠡᠳ ︽ᠡᠩ ᠤᠨ᠂ ᠪᠤᠷᠣᠭᠵᠢᠭᠤᠨ ᠬᠠᠷᠠᠭᠳᠠᠬᠤ ᠠᠳᠠᠯ᠎ᠠ ᠰᠡᠳᠬᠢᠯ ᠤᠨ ᠲᠣᠳᠣᠭᠠᠳᠣ ᠲᠠᠮᠢᠷ ᠨᠢ ᠡᠷᠴᠢᠮᠯᠢᠭ᠂ ᠬᠦᠮᠦᠨ ᠤ ᠣᠶᠣᠨ ᠣᠬᠠᠭᠠᠨ ᠢ ᠶᠠᠭᠤᠨ ᠠᠴᠠ ᠴᠦ ᠡᠷᠬᠢᠮ ᠪᠤᠯᠭᠠᠨ ᠲᠡᠬᠡᠵᠢᠯᠠᠨ ᠶᠠᠪᠤᠳᠠᠭ︾ ︽ᠣᠬᠠᠭ᠎ᠠ ᠲᠠᠢ ᠰᠡᠬᠡᠬᠡ ᠲᠠᠢ︾ ︽ᠬᠦᠮᠦᠨ ᠤ ᠰᠡᠳᠬᠢᠯ ᠢ ᠨᠠᠮᠣᠷ ᠤᠨ ᠰᠦᠨᠢ ᠶᠢᠨ ᠰᠠᠷᠠᠨ ᠮᠡᠳᠣ ᠲᠣᠩᠭᠠᠯᠠᠭ ᠲᠣᠭᠳᠠᠭᠤᠨ ᠪᠤᠯᠭᠠᠳᠠᠭ ᠠᠭᠠᠳ ᠠᠰᠬ᠎ᠠ ᠬᠠᠳᠠᠨ ᠠᠴᠠ ᠠᠰᠬᠠᠷᠠᠨ ᠪᠠᠭᠤᠬᠤ ᠣᠷᠣᠰᠬᠠᠯ ᠣᠰᠣᠨ ᠮᠡᠳᠣ ᠲᠣᠭᠳᠣᠯᠣᠭᠤᠯᠳᠠᠭ︾ ᠲᠡᠳᠡᠭᠡᠷ ᠬᠦᠮᠦᠰ ︽ᠮᠢᠨᠦ ᠬᠤᠪᠢ ᠳᠤ ᠬᠠᠮᠢᠭ᠎ᠠ ᠠᠴᠠ ᠡᠷᠢᠵᠦ ᠣᠯᠳᠠᠳᠠᠭ ᠦᠬᠡᠢ ᠰᠣᠷᠬᠤ ᠪᠢᠴᠢᠭ ᠪᠠᠶᠢᠭᠰᠠᠨ︾ ᠭᠡᠵᠦ ᠪᠤᠳᠣᠳᠠᠭ᠃ ᠲᠡᠳᠡᠨ ᠤ ︽ᠰᠣᠶᠣᠯ ᠲᠡᠦᠬᠡ ᠪᠠᠨ ᠰᠠᠶᠢᠨ ᠮᠡᠳᠡᠳᠡᠭ ᠮᠦᠷᠳᠡᠬᠡᠨ ᠰᠣᠶᠣᠯ ᠲᠡᠦᠬᠡ ᠳᠡᠭᠡᠨ ᠬᠠᠶᠢᠷᠠᠳᠠᠢ ᠪᠠᠶᠢᠳᠠᠭ ᠬᠠᠯᠠᠭᠤᠨ ᠰᠡᠳᠬᠢᠯ ᠨᠢ ᠦᠨᠡᠬᠡᠷ ᠪᠢᠰᠢᠷᠡᠯᠳᠡᠢ ᠪᠦᠭᠡᠳ ᠰᠣᠷᠣᠯᠴᠠᠭᠤᠰᠢᠳᠠᠢ︾ ᠶᠣᠮ᠂ ᠦᠪᠡᠷ ᠤᠨ ᠬᠠᠳᠠᠭᠠᠯᠠᠭᠠᠰᠣᠳᠠᠢ ᠨᠣᠮ ᠰᠣᠳᠣᠷ ᠢᠶᠠᠨ ᠬᠠᠷᠠᠮᠨᠠᠯ ᠦᠬᠡᠢ ᠦᠵᠡᠬᠦᠯᠳᠡᠭ ︽ᠴᠠᠰᠣ ᠰᠢᠭ᠋ ᠴᠠᠭᠠᠨ ᠰᠡᠳᠬᠢᠯ ᠲᠠᠢ︾ ᠦᠬᠡᠯᠡᠳ ᠡᠵᠢ ᠰᠢᠬᠢᠷ ︵ᠰᠠᠶᠢᠨᠴᠤᠭ ᠤᠨ ᠡᠵᠢ︶᠂ ᠣᠳᠠᠭ᠎ᠠ ᠪᠤᠯᠭᠠᠨ ᠤ ᠬᠡᠬᠡᠷ᠎ᠡ ᠶᠢᠨ ᠪᠠᠶᠢᠴᠠᠭᠠᠯᠳᠠ ᠳᠤ ᠲᠣᠰᠠ ᠲᠡᠮ ᠪᠤᠯᠵᠦ᠂ ᠡᠶᠢᠰᠢ ᠲᠡᠶᠢᠰᠢ ᠲᠠᠭᠠᠭᠤᠯᠣᠭᠠᠳ ᠶᠠᠪᠤᠳᠠᠭ ᠠᠮᠣᠷ ᠬᠡᠩᠬᠡᠢ᠂ ᠠᠶᠢᠨᠳᠠᠢ ᠪᠠᠭᠰᠢ᠂ ᠲᠠᠷᠢᠶᠠᠴᠢ ᠲᠦᠷᠦᠪᠠᠳᠣ ᠨᠠᠷ ᠢ ︽ᠡᠬᠡᠯ ᠵᠢᠷ ᠤᠨ ᠠᠭᠠᠳ ᠠᠭᠤᠣ ᠶᠡᠭᠡ ᠰᠣᠶᠣᠯ ᠤᠨ ᠵᠢᠳᠬᠦᠯᠳᠠᠨ︾ ᠭᠡᠵᠦ ᠬᠦᠨᠳᠣᠳᠬᠡᠨ ᠪᠢᠰᠢᠷᠡᠳᠡᠭ᠃ ᠬᠤᠪᠳᠣ ᠲᠠᠢ ᠰᠣᠳᠣᠷ ᠢᠶᠠᠨ ᠨᠡᠬᠡᠬᠡᠵᠦ᠂ ᠶᠣᠰᠣ ᠵᠠᠩᠰᠢᠯ ᠢᠶᠠᠨ ᠲᠠᠨᠢᠯᠴᠠᠭᠤᠯᠵᠦ ᠪᠠᠶᠢᠭᠰᠠᠨ ᠬᠠᠷ᠎ᠠ ᠶᠢᠨ ᠲᠣᠭᠳᠠᠬᠤ ᠶᠢ ︽ᠪᠠᠯᠠᠷᠠᠭᠰᠠᠨ ᠲᠦᠷᠦ ᠶᠢᠨ ᠪᠠᠭᠤᠷᠢᠨ ᠲᠡᠬᠡᠷ᠎ᠡ ᠵᠠᠯᠭᠠᠨ ᠪᠢᠴᠢᠭᠳᠡᠭᠰᠡᠭᠡᠷ ᠪᠠᠶᠢᠭ᠎ᠠ ᠨᠢᠬᠡᠨ ᠢᠵᠢ ᠣᠶᠢᠷᠠᠳ ᠤᠨ ᠣᠨ ᠲᠠᠷᠠᠭᠠᠯᠠᠭᠰᠠᠨ ᠠᠮᠢᠳᠣ ᠲᠡᠦᠬᠡ︾ ᠭᠡᠵᠦ ᠦᠨᠳᠣᠷ ᠦᠨᠡᠯᠡᠵᠦ ᠪᠠᠶᠢᠭᠰᠠᠨ᠃ ᠵᠣᠬᠢᠶᠠᠭᠴᠢ ᠡᠳᠡᠭᠡᠷ ᠰᠣᠶᠣᠯ ᠲᠡᠦᠬᠡ ᠳᠡᠭᠡᠨ ᠬᠠᠶᠢᠷᠠᠳᠠᠢ᠂ ᠰᠣᠶᠣᠯ ᠢᠶᠠᠨ ᠪᠤᠰᠣᠳ ᠠᠴᠠ ᠬᠠᠷᠠᠮᠨᠠᠯ ᠦᠬᠡᠢ ᠬᠤᠪᠢᠶᠠᠯᠴᠠᠨ ᠪᠠᠶᠠᠰᠳᠠᠭ᠂ ᠰᠣᠶᠣᠯ ᠤᠨ ᠲᠦᠯᠦᠬᠡ ᠵᠢᠳᠬᠦᠵᠦ ᠶᠠᠪᠤᠭᠰᠠᠳ ᠢ ᠲᠣᠰᠠᠯᠠᠵᠦ ᠲᠡᠮᠵᠢᠵᠦ ᠶᠠᠪᠤᠳᠠᠭ ᠬᠦᠮᠦᠰ ᠲᠤ ᠲᠠᠯᠠᠷᠠᠬᠠᠨ᠂ ᠬᠦᠨᠳᠣᠳᠬᠡᠨ ᠪᠢᠰᠢᠷᠡᠵᠦ ᠪᠠᠶᠢᠳᠠᠭ ᠲᠡᠳᠣᠢ ᠦᠬᠡᠢ᠂ ︽ᠬᠢᠵᠠᠭᠠᠷ ᠦᠬᠡᠢ ᠠᠭᠤᠳᠠᠮ ᠪᠠᠶᠢᠭᠠᠯᠢ ᠲᠡᠯᠡᠬᠡᠢ ᠶᠢᠨ ᠲᠣᠮᠳᠠ ᠠᠮᠢᠳᠣ ᠠᠮᠢᠳᠠᠨ ᠢ ᠡᠷᠬᠢᠯᠡᠨ ᠠᠷᠠᠴᠢᠯᠠᠳᠠᠭ ᠬᠦᠮᠦᠰ ᠤᠨ ᠰᠡᠳᠬᠢᠯ ᠲᠡᠩᠳᠡᠬᠦᠦ ᠠᠭᠤᠵᠢᠮ ᠲᠠᠶᠢᠪᠤᠭᠤ᠂ ᠦᠷᠦᠪᠴᠢ ᠨᠢᠩᠵᠢᠨ︾᠂ ︽ᠨᠠᠷᠠ ᠰᠠᠯᠬᠢᠨ ᠳᠤ ᠪᠤᠷᠣᠯᠠᠭᠰᠠᠨ ᠮᠠᠯᠴᠢᠨ ᠠᠷᠠᠳ ᠨᠢᠬᠡᠪᠤᠷᠢ ᠰᠡᠳᠬᠢᠴᠨ ᠵᠦᠢ ᠶᠢᠨ ᠣᠬᠠᠭᠠᠨᠳᠠᠨ︾ ᠭᠡᠵᠦ ᠮᠠᠯᠴᠢᠨ ᠠᠷᠠᠳ ᠤᠨ ᠵᠠᠩ ᠠᠷᠠᠨᠰᠢᠨ ᠢ ᠴᠦ ᠱᠠᠭᠰᠢᠨ ᠪᠠᠭ᠋ᠠᠷᠠᠵᠦ ᠪᠠᠶᠢᠳᠠᠭ᠃ ᠬᠡᠷᠪᠡ ᠵᠣᠬᠢᠶᠠᠭᠴᠢ ᠡᠳᠡᠭᠡᠷ ᠬᠦᠮᠦᠰ ᠢ ᠪᠢᠰᠢᠷᠡᠨ ᠬᠦᠨᠳᠣᠳᠬᠡᠳᠡᠭ ᠪᠠᠶᠢᠭᠰᠠᠨ ᠪᠤᠯ ᠶᠠᠭ ᠡᠨᠡ ᠪᠢᠰᠢᠷᠡᠯ ᠬᠦᠨᠳᠣᠳᠬᠡᠯ ᠨᠢ ᠲᠡᠬᠦᠨ ᠤ ᠬᠠᠷᠠᠮᠰᠠᠯ ᠭᠤᠨᠢᠭ ᠢ ᠪᠤᠢ ᠪᠤᠯᠭᠠᠪᠠ᠃ ᠲᠡᠬᠦᠨ ᠤ ᠪᠠᠭ᠋ᠠᠷᠠᠨ ᠪᠢᠰᠢᠷᠡᠳᠡᠭ ︽ᠠᠮᠠᠨ ᠣᠯᠠᠮᠵᠢᠯᠠᠯ ᠢᠶᠠᠨ ᠰᠠᠶᠢᠨ ᠮᠡᠳᠡᠳᠡᠭ ᠠᠭᠠᠳ ᠪᠢᠴᠢᠭ ᠤᠨ ᠣᠯᠠᠮᠵᠢᠯᠠᠯ ᠢᠶᠠᠨ ᠬᠦᠢᠴᠡᠳ ᠬᠠᠳᠠᠭᠠᠯᠠᠵᠦ ᠬᠤᠶᠢᠴᠢ ᠦᠶ᠎ᠡ ᠳᠡᠭᠡᠨ ᠵᠣᠯᠭᠠᠭᠤᠯᠣᠭᠰᠠᠨ ᠣᠬᠠᠭᠠᠨᠳᠣ ᠪᠤᠭᠤᠷᠣᠯ᠂ ᠬᠠᠮᠤᠭ ᠰᠡᠬᠦᠯᠴᠢ ᠶᠢᠨ ᠮᠠᠭᠳᠠᠭᠠᠯ ᠬᠠᠶᠢᠯᠠᠭᠴᠢ︾ ᠣᠷᠴᠢᠯᠠᠩ ᠢ ᠣᠷᠬᠢᠵᠦ ᠶᠠᠪᠤᠬᠤ ᠪᠠᠷ ᠵᠣᠬᠢᠶᠠᠭᠴᠢ ᠳᠤ ︽ᠡᠨᠡ ᠨᠠᠰᠣᠨ ᠤ ᠮᠣᠩᠭᠤᠯ ᠰᠣᠳᠣᠯᠣᠯ ᠤᠨ ᠨᠦᠬᠦᠬᠦ ᠶᠢᠨ ᠠᠷᠭ᠎ᠠ ᠦᠬᠡᠢ︾ ᠬᠢᠵᠠᠭᠠᠯᠠᠰᠢ ᠦᠬᠡᠢ ᠬᠠᠷᠠᠮᠰᠠᠯ ᠪᠤᠯᠵᠦ ᠬᠤᠴᠣᠷᠪᠠ᠃ ᠵᠣᠬᠢᠶᠠᠭᠴᠢ ᠳᠤ ᠠᠪᠴᠣ ᠬᠡᠯᠡᠪᠡᠯ᠂ ᠲᠡᠳᠡ ᠪᠤᠯ᠂ ︽ᠪᠠᠯᠠᠷᠠᠮᠠᠷ ᠪᠤᠯᠤᠭᠰᠠᠨ ᠰᠣᠶᠣᠯ ᠢᠶᠠᠨ ᠪᠦᠳᠣᠨ ᠪᠠᠶᠢᠯᠭᠠᠵᠦ ᠴᠢᠳᠠᠭᠰᠠᠨ︾ ︽ᠦᠬᠡᠯᠡᠳ ᠨᠣᠳᠤᠭ ᠤᠨ ᠰᠠᠬᠢᠭᠤᠰᠣ︾ ᠪᠠᠶᠢᠭ᠎ᠠ ᠪᠤᠯᠬᠤᠷ ᠡᠨᠡ ᠰᠠᠶᠢᠬᠠᠨ ᠬᠦᠮᠦᠰ ᠤᠨ ᠦᠬᠡᠢ ᠪᠤᠯᠬᠤ ᠶᠢ ᠲᠠᠭᠠᠯᠳᠣᠭᠠᠳ ᠠᠮᠢᠳᠣ ᠲᠡᠦᠬᠡ ᠲᠠᠰᠣᠯᠣᠭᠳᠠᠵᠦ ᠭᠡᠭᠡᠭᠳᠡᠭᠦᠵᠡᠢ ᠭᠡᠵᠦ ᠬᠠᠷᠠᠮᠰᠠᠬᠤ ᠦᠬᠡᠢ ᠪᠠᠶᠢᠬᠤ ᠶᠢᠨ ᠠᠷᠭ᠎ᠠ ᠦᠬᠡᠢ ᠶᠣᠮ᠃      ︽ᠨᠣᠳᠤᠭ ᠤᠨ ᠨᠠᠪᠳᠠᠭ ᠰᠠᠪᠳᠠᠭ ᠲᠤ ᠬᠠᠶᠢᠷ᠎ᠠ ᠦᠬᠡᠢ ᠬᠦᠷᠦᠭᠰᠡᠨ ᠨᠢᠬᠦᠯᠳᠠᠨ ᠤ ᠭᠠᠷ ᠢ ᠪᠤᠳᠣᠬᠤ ᠳᠤ ᠠᠭᠤᠷ ᠣᠨᠳᠣᠭᠤᠴᠠᠯ ᠴᠡᠬᠡᠵᠢᠨ ᠳᠤ ᠪᠦᠭᠯᠡᠷᠡᠳᠡᠭ︾᠃ ᠵᠣᠬᠢᠶᠠᠯ ᠳᠤ ᠡᠶᠢᠨ ᠬᠦ ᠬᠢᠯᠢᠭᠨᠡᠯ᠂ ᠣᠨᠳᠣᠭᠤᠴᠠᠯ ᠤᠨ ᠰᠡᠳᠬᠢᠯᠬᠡ ᠡᠬᠦᠰᠦᠭᠰᠡᠨ ᠨᠢ ᠮᠦᠨ ᠬᠦ ᠦᠷᠦ ᠵᠢᠷᠣᠬᠡᠨ ᠠᠴᠠ ᠪᠠᠨ ᠬᠠᠶᠢᠷᠠᠳᠠᠢ ᠪᠠᠶᠢᠳᠠᠭ ᠦᠪ ᠰᠣᠶᠣᠯ ᠢ ᠪᠤᠷᠣᠭᠤ ᠪᠠᠷ ᠶᠠᠷᠢᠨ᠂ ᠲᠣᠣᠷᠠᠰᠢᠶᠠᠵᠦ ᠭᠠᠳᠠᠭᠤᠷᠴᠢᠯᠠᠵᠦ᠂ ᠴᠢᠨᠠᠭᠰᠢᠯᠠᠨ ᠡᠪᠳᠡᠵᠦ ᠰᠦᠢᠳᠬᠡᠭᠰᠡᠳ ᠲᠤ ᠦᠬᠦᠨ ᠬᠤᠷᠣᠰᠬᠤ ᠰᠡᠳᠬᠢᠯᠬᠡ ᠨᠢ ᠰᠢᠭᠤᠳ ᠢᠯᠡᠷᠡᠭᠰᠡᠨ ᠶᠣᠮ᠃ ︽ᠣᠶᠢᠷᠠᠳ ᠤᠨ ᠲᠡᠦᠬᠡ ᠰᠣᠶᠣᠯ ᠤᠨ ᠴᠢᠬᠤᠯᠠ ᠲᠣᠷᠠᠰᠬᠠᠯ ᠢᠩᠬᠢᠵᠦ ᠰᠣᠶᠣᠯ ᠲᠡᠦᠬᠡ ᠮᠡᠳᠡᠳᠡᠭ ᠦᠬᠡᠢ᠂ ᠨᠡᠩ ᠴᠦ ᠬᠠᠳᠠᠭᠠᠯᠠᠵᠦ ᠬᠠᠮᠠᠭᠠᠯᠠᠬᠤ ᠶᠢ ᠰᠣᠪᠢᠳᠠᠭ ᠴᠦ ᠦᠬᠡᠢ ᠬᠠᠷᠠᠩᠭᠤᠢ ᠬᠦᠮᠦᠰ ᠤᠨ ᠭᠠᠷ ᠲᠤ ᠣᠷᠣ ᠦᠬᠡᠢ ᠠᠯᠠᠭ᠎ᠠ ᠪᠤᠯᠤᠭᠰᠠᠨ︾ ᠳᠤ ᠰᠡᠬᠦᠷᠡᠰᠣ ᠠᠯᠳᠠᠨ ᠵᠣᠪᠠᠨᠢᠯ ᠪᠠ ᠠᠭᠤᠷ ᠬᠢᠯᠢᠩ ᠵᠢᠷᠣᠬᠡ ᠶᠢ ᠨᠢ ᠪᠠᠵᠠᠭᠰᠠᠨ᠃ ︽ᠵᠡᠯᠢᠬᠦᠳ ᠬᠤᠯᠠ ᠶᠢᠨ ᠠᠭᠤᠯᠠ ᠲᠠᠯ᠎ᠠ ᠳᠤ ᠠᠮᠢᠳᠣᠷᠠᠭᠰᠠᠨ ᠠᠭᠠᠳ ᠰᠣᠶᠣᠯ ᠲᠡᠦᠬᠡ ᠪᠠᠨ ᠶᠠᠭᠤᠨ ᠠᠴᠠ ᠴᠦ ᠡᠷᠬᠢᠮ ᠨᠠᠨᠳᠢᠨ ᠠᠷᠢᠭᠤᠨ ᠰᠢᠳᠣᠬᠡᠨ ᠪᠤᠯᠭᠠᠵᠦ ᠶᠠᠪᠣᠳᠠᠭ ᠠᠷᠠᠳ ᠲᠦᠮᠡᠨ ᠢ ᠪᠠᠯᠠᠢ᠂ ᠪᠦᠳᠦᠬᠦᠯᠢᠭ ᠭᠡᠵᠦ ᠪᠣᠳᠤᠭ᠎ᠠ ᠴᠢ ᠬᠡᠨ ᠭᠡᠭᠴᠢ ᠪᠤᠢ︖︾ ᠭᠡᠵᠦ ᠪᠤᠰᠣᠳ ᠤᠨ ᠰᠣᠶᠣᠯ ᠢ ᠲᠣᠣᠷᠠᠰᠢᠶᠠᠵᠦ ᠦᠵᠡᠳᠡᠭ ᠬᠦᠮᠦᠰ ᠲᠤ ᠬᠢᠯᠢᠩᠨᠡᠵᠦ ᠪᠠᠶᠢᠭ᠎ᠠ ᠪᠦᠬᠡᠳ ︽ᠨᠢᠬᠡ ᠪᠤᠯ ᠦᠪᠡᠷ ᠤᠨ ᠰᠣᠶᠣᠯ ᠢ ᠯᠡ ᠲᠡᠷᠢᠬᠦᠨ ᠤ ᠭᠡᠵᠦ ᠪᠤᠳᠣᠳᠠᠭ ᠲᠡᠬᠡᠷᠡᠩᠬᠦᠢ ᠬᠦᠮᠦᠨ᠂ ᠡᠰᠡᠬᠦᠯ᠎ᠡ ᠣᠨᠳᠣᠣ ᠰᠣᠶᠣᠯ ᠢ ᠣᠶᠢᠯᠠᠭᠠᠶ᠎ᠠ ᠭᠡᠵᠦ ᠪᠣᠳᠣᠳᠠᠭ ᠦᠬᠡᠢ ᠵᠡᠷᠯᠢᠭ ᠰᠠᠨᠠᠭ᠎ᠠ ᠲᠠᠢ ᠪᠤᠷᠣᠩᠬᠤᠢ ᠠᠮᠢᠳᠠᠨ︾ ᠭᠡᠵᠦ ︽ᠨᠡᠬᠦᠳᠡᠯ ᠰᠣᠶᠣᠯ ᠢ ᠲᠣᠷᠣᠮᠵᠢᠯᠠᠨ ᠭᠠᠳᠠᠭᠤᠷᠬᠠᠳᠠᠭ ᠲᠡᠷᠡ ᠪᠦᠯᠦᠭ ᠬᠦᠮᠦᠰ︾ ᠲᠤ ᠬᠤᠷᠣᠰᠣᠯ ᠬᠢᠯᠢᠩ ᠲᠦᠷᠦᠵᠦ ᠪᠠᠶᠢᠳᠠᠭ᠃ ᠲᠣᠰ ᠨᠠᠶᠢᠷᠠᠭᠤᠯᠣᠯ ᠳᠤ ᠪᠠᠶᠠᠷᠯᠠᠭᠰᠠᠨ᠂ ᠪᠢᠰᠢᠷᠡᠭᠰᠡᠨ᠂ ᠬᠠᠷᠠᠮᠰᠠᠭᠰᠠᠨ ᠰᠡᠳᠬᠢᠯᠬᠡ ᠠᠴᠠ ᠭᠠᠳᠠᠨ᠎ᠠ ᠨᠠᠶᠢᠷᠠᠭᠤᠯᠣᠯ ᠢ ᠡᠬᠢᠨ ᠠᠴᠠ ᠨᠢ ᠠᠳᠠᠭ ᠲᠤᠨᠢ ᠬᠦᠷᠳᠡᠯ᠎ᠡ ᠨᠡᠶᠢᠳᠡᠮ ᠬᠤᠯᠪᠤᠵᠦ ᠪᠠᠶᠢᠭ᠎ᠠ ᠪᠤᠯ ᠵᠣᠬᠢᠶᠠᠭᠴᠢ ᠶᠢᠨ ᠭᠤᠨᠢᠭᠳᠣ ᠰᠡᠳᠬᠢᠯᠬᠡ ᠶᠣᠮ᠃ ᠦᠬᠡᠯᠡᠳ ᠠᠷᠠᠳ ᠤᠨ ᠲᠣᠮᠳᠠ ᠣᠳᠠᠭᠠᠨ ᠵᠢᠯ ᠬᠡᠬᠡᠷ᠎ᠡ ᠶᠢᠨ ᠪᠠᠶᠢᠴᠠᠭᠠᠯᠳᠠ ᠬᠢᠵᠦ᠂ ᠲᠡᠦᠬᠡ ᠰᠣᠶᠣᠯ ᠢ ᠬᠦᠨ ᠣᠶᠢᠯᠠᠭᠠᠭᠰᠠᠨ ᠡᠷᠳᠡᠮᠳᠡᠨ ᠤ ᠬᠤᠪᠢ ᠳᠤ᠂ ᠦᠨᠳᠣᠰᠣᠳᠠᠨ ᠤ ᠰᠣᠶᠣᠯ ᠨᠢ ᠲᠠᠸᠠᠷᠴᠢᠯᠠᠯ ᠪᠠ ᠲᠠᠶᠠᠭᠠᠷᠴᠢᠯᠠᠯ ᠤᠨ ᠬᠦᠴᠦᠳᠣ ᠣᠷᠣᠰᠬᠠᠯ ᠳᠤ ᠲᠠᠭᠠᠷᠢᠭᠳᠠᠨ ᠢᠳᠡᠭ ᠢᠳᠡᠭ ᠢᠶᠠᠷ ᠪᠠᠯᠠᠷᠠᠨ ᠣᠰᠠᠳᠴᠣ ᠪᠠᠶᠢᠭ᠎ᠠ ᠳᠤ ᠦᠪᠡᠷ ᠤᠨ ᠡᠷᠬᠡ ᠦᠬᠡᠢ ᠡᠮᠬᠡᠨᠢᠨ ᠵᠣᠪᠠᠵᠦ ᠪᠠᠶᠢᠳᠠᠭ᠃ ᠨᠠᠶᠢᠷᠠᠭᠤᠯᠣᠯ ᠠᠴᠠ ᠵᠣᠬᠢᠶᠠᠭᠴᠢ ᠶᠢᠨ ᠲᠡᠦᠬᠡ ᠶᠢᠨ ᠲᠣᠬᠠᠢ᠂ ᠰᠣᠶᠣᠯ ᠤᠨ ᠲᠣᠬᠠᠢ ᠬᠦᠨ ᠪᠤᠳᠣᠯᠭᠠᠰᠢᠷᠠᠯ ᠠᠴᠠ ᠰᠣᠶᠣᠯ ᠤᠨ ᠬᠦᠨ ᠬᠦᠵᠡᠬᠡᠢ ᠠᠭᠤᠯᠣᠭᠳᠠᠬᠤᠨ᠂ ᠠᠮᠢ ᠨᠠᠰᠣᠨ ᠤ ᠦᠷᠭᠡᠨ ᠪᠠᠶᠠᠯᠢᠭ ᠠᠭᠤᠯᠭ᠎ᠠ ᠪᠠ ᠲᠡᠦᠬᠡ ᠶᠢᠨ ᠨᠠᠷᠢᠨ ᠪᠤᠳᠣᠯᠢᠶᠠᠨᠳᠠᠢ ᠵᠦᠢᠯ ᠤᠳ ᠢ ᠣᠯᠵᠦ ᠬᠠᠷᠠᠵᠦ ᠪᠤᠯᠤᠨ᠎ᠠ᠃ ᠶᠠᠭ ᠵᠣᠬᠢᠶᠠᠯ ᠳᠤ ᠶᠠᠷᠢᠭᠰᠠᠨ ᠰᠢᠭ᠋ ︽ᠲᠡᠦᠬᠡ ᠶᠢᠨ ᠬᠡᠷᠡᠭ ᠣᠴᠢᠷ ᠤᠨ ᠴᠠᠭᠠᠨᠠᠬᠢ ᠵᠦᠢᠯ ᠢ ᠨᠡᠪᠳᠡ ᠣᠶᠢᠯᠠᠭᠠᠨ ᠮᠡᠳᠡᠵᠦ ᠲᠡᠦᠬᠡᠨ ᠬᠦᠮᠦᠰ ᠤᠨ ᠠᠯᠳᠠᠰᠢ ᠣᠨᠣᠰᠢ ᠬᠤᠶᠠᠷ ᠢ ᠰᠡᠷᠬᠦᠯᠡᠩ ᠣᠬᠠᠭᠠᠨ ᠢᠶᠠᠷ ᠲᠣᠩᠭᠠᠨ ᠪᠤᠳᠣᠳᠠᠭ ᠲᠡᠦᠬᠡᠴᠢ᠂ ᠲᠣᠬᠠᠢ ᠶᠢᠨ ᠲᠡᠦᠬᠡᠨ ᠠᠬᠤᠢ ᠳᠠᠬᠢ ᠬᠦᠮᠦᠨ ᠠᠴᠠ ᠴᠦ ᠢᠯᠡᠬᠦᠦ ᠡᠮᠵᠡᠭᠯᠡᠨ ᠵᠣᠪᠠᠳᠠᠭ︾᠃ ᠵᠣᠬᠢᠶᠠᠭᠴᠢ ᠲᠡᠦᠬᠡ᠂ ᠰᠣᠶᠣᠯ ᠳᠤ ᠬᠠᠨᠳᠣᠵᠦ ᠶᠠᠷᠢᠯᠴᠠᠬᠤ ᠳᠠᠭᠠᠨ ᠬᠡᠬᠦᠳᠡᠭ ᠲᠦᠬᠦᠷᠡᠩ ᠰᠣᠶᠣᠯ ᠮᠡᠳᠡᠯᠬᠡ ᠪᠠᠷ ᠲᠡᠳᠡᠭᠡᠷ ᠮᠠᠷᠳᠠᠭᠳᠠᠵᠦ᠂ ᠬᠦᠮᠦᠰ ᠤᠨ ᠣᠢ ᠪᠤᠳᠣᠯ ᠠᠴᠠ ᠠᠷᠢᠯᠣᠨ ᠣᠳᠣᠵᠦ ᠪᠤᠢ ᠲᠡᠦᠬᠡ ᠰᠣᠶᠣᠯ ᠤᠨ ᠮᠡᠳᠡᠯᠬᠡ ᠶᠢ ᠬᠦᠮᠦᠰ ᠲᠤ ᠲᠠᠬᠢᠨ ᠲᠡᠯᠬᠡᠨ ᠦᠵᠡᠬᠦᠯᠵᠦ ᠴᠢᠳᠠᠵᠠᠢ᠃ ᠵᠣᠬᠢᠶᠠᠭᠴᠢ ᠪᠢᠳᠡᠨ ᠳᠤ ᠲᠡᠦᠬᠡ᠂ ᠰᠣᠶᠣᠯ ᠤᠨ ᠣᠯᠠᠨ ᠮᠡᠳᠡᠯᠬᠡ ᠣᠯᠭᠤᠵᠦ ᠦᠭᠭᠦᠭᠰᠡᠨ ᠲᠡᠳᠣᠢ ᠪᠠᠷ ᠵᠣᠭᠰᠣᠬᠤ ᠪᠢᠰᠢ᠂ ᠡᠨᠡ ᠮᠡᠳᠡᠯᠬᠡ ᠳᠡᠭᠡᠨ ᠰᠠᠭᠤᠷᠢᠯᠠᠵᠦ᠂ ᠡᠷᠳᠡᠨ ᠡᠳᠣᠬᠡ᠂ ᠵᠦᠪ ᠪᠤᠷᠣᠭᠤ ᠶᠢᠨ ᠲᠣᠬᠠᠢ ᠦᠪᠡᠷ ᠤᠨ ᠦᠵᠡᠯᠳᠡ ᠵᠣᠭᠰᠣᠯᠳᠠ ᠪᠠᠨ ᠰᠢᠭᠤᠳ ᠢᠯᠡᠷᠬᠡᠶᠢᠯᠡᠵᠡᠢ᠃ ᠡᠨᠡ ᠪᠤᠯ ᠲᠠᠷᠣᠢ ᠨᠢᠬᠡᠨ ᠰᠡᠬᠡᠬᠡᠳᠡᠨ ᠬᠦᠮᠦᠨ ᠤ ᠣᠭᠤᠷᠴᠣ ᠦᠯᠦ ᠪᠤᠯᠬᠤ ᠲᠠᠷᠬᠠᠨ ᠬᠠᠷᠢᠭᠤᠴᠠᠯᠭ᠎ᠠ ᠨᠢ ᠶᠣᠮ᠃ ᠲᠡᠷᠡ ︽ᠪᠢᠳᠡᠨ ᠢ ᠠᠩᠵᠠᠭᠠᠷᠠᠬᠤ ᠦᠬᠡᠢ ᠶᠢᠨ ᠵᠠᠪ ᠲᠤ᠂ ᠰᠣᠶᠣᠯ ᠤᠨ ᠵᠠᠷᠢᠮ ᠦᠨᠡᠳᠣ ᠵᠦᠢᠯ ᠤᠳ ᠠᠮᠠᠷᠬᠠᠨ ᠢᠶᠠᠷ ᠬᠡᠬᠡᠭᠳᠡᠨ ᠬᠠᠶᠠᠭᠳᠠᠵᠦ︾᠂ ᠣᠵᠠᠭᠤᠷ ᠰᠣᠶᠣᠯ ᠠᠴᠠ ᠪᠠᠨ ᠣᠯᠠᠮ ᠢᠶᠠᠷ ᠬᠤᠯᠠᠳᠠᠨ ᠪᠠᠶᠢᠭ᠎ᠠ᠂ ᠭᠠᠶᠢᠬᠠᠮᠰᠢᠭᠳᠣ ᠰᠣᠶᠣᠯ ᠪᠠᠯᠠᠷᠠᠨ ᠰᠦᠢᠳᠴᠣ᠂ ᠠᠯᠳᠠᠭᠳᠠᠵᠦ ᠭᠡᠭᠡᠭᠳᠡᠵᠦ ᠪᠠᠶᠢᠭ᠎ᠠ ᠳᠤ ᠰᠡᠳᠬᠢᠯ ᠡᠮᠵᠡᠭᠯᠡᠵᠦ ᠪᠠᠶᠢᠳᠠᠭ ᠠᠴᠠ ︽ᠦᠨᠳᠣᠰᠣᠳᠠᠨ ᠤ ᠪᠠᠨ ᠪᠢᠴᠢᠭ ᠰᠣᠶᠣᠯ ᠤᠨ ᠲᠠᠩᠬᠢᠯ ᠪᠢᠯᠢᠭ ᠲᠤ ᠲᠦᠰᠢᠨ ᠲᠡᠬᠦᠨ ᠤ ᠰᠢᠮ᠎ᠡ ᠬᠦᠴᠦᠨ ᠢᠶᠠᠷ ᠪᠢᠴᠢᠭᠳᠡᠨ ᠰᠡᠬᠡᠬᠡᠳᠡᠨ ᠪᠤᠯᠵᠦ ᠡᠳᠣᠢ ᠳᠤ ᠬᠦᠷᠦᠬᠡᠳ ᠮᠡᠳᠡᠭᠰᠡᠨ ᠰᠣᠷᠣᠭᠰᠠᠨ ᠢᠶᠠᠨ ᠲᠡᠯᠡᠬᠡᠢ ᠶᠢᠨ ᠲᠦᠮᠡᠨ᠎ᠡ ᠲᠠᠨᠢᠭᠤᠯᠬᠤ ᠡᠬᠦᠷᠬᠡ ᠶᠢ ᠬᠦᠯᠢᠶᠡᠭᠰᠡᠨ ᠨᠠᠳᠠ ᠳᠤ ᠠᠷᠠᠳ ᠤᠨ ᠲᠣᠮᠳᠠ ᠦᠯᠡᠳᠡᠭᠳᠡᠭᠰᠡᠨ ᠣᠯᠠᠨ ᠨᠣᠮ ᠲᠡᠪᠳᠡᠷ ᠢ ᠰᠣᠷᠪᠤᠯᠵᠢᠯᠠᠨ ᠪᠠᠶᠢᠴᠠᠭᠠᠵᠦ᠂ ᠢᠯᠡᠷᠡᠬᠦᠯᠦᠨ ᠰᠣᠳᠣᠯᠬᠤ ᠨᠢ ᠲᠦᠯᠬᠢᠵᠦ ᠪᠤᠯᠤᠰᠢ ᠦᠬᠡᠢ ᠬᠠᠷᠢᠭᠤᠴᠠᠯᠭ᠎ᠠ ᠭᠡᠵᠦ ᠬᠡᠵᠢᠶᠡᠳᠡ ᠪᠤᠳᠣᠳᠠᠭ︾᠃ ᠵᠣᠬᠢᠶᠠᠭᠴᠢ ᠪᠤᠯ ︽ᠵᠣᠪᠠᠨᠢᠯ ᠢᠶᠠᠷ ᠲᠦᠬᠦᠷᠡᠩ ᠬᠦᠦᠷᠨᠢᠭᠴᠢ︾ ᠶᠣᠮ᠃       ᠲᠡᠷᠡ ᠬᠦᠨᠳᠣ ᠴᠢᠬᠢᠮᠠᠢ ᠭᠤᠨᠢᠭᠳᠣ ᠰᠡᠳᠬᠢᠯᠬᠡ ᠪᠠᠷ ᠰᠣᠶᠣᠯ ᠤᠨ ᠲᠣᠯᠭᠠᠷᠠᠵᠦ ᠪᠠᠶᠢᠭ᠎ᠠ ᠬᠢᠮᠦᠷᠠᠯ ᠳᠤ ᠰᠡᠳᠬᠢᠯ ᠵᠣᠪᠠᠵᠦ ᠪᠠᠶᠢᠭ᠎ᠠ ᠪᠣᠯᠪᠠᠴᠣ᠂ ᠬᠦᠰᠡᠯᠡᠩᠳᠦ ᠦᠵᠡᠯ ᠰᠠᠨᠠᠭ᠎ᠠ ᠡᠪᠤᠷᠯᠡᠵᠦ ᠦᠪᠡᠷ ᠤᠨ ᠰᠡᠳᠬᠢᠯ ᠢᠶᠠᠨ ᠲᠠᠶᠢᠳᠬᠤᠷᠠᠭᠤᠯᠵᠦ ᠪᠠᠶᠢᠳᠠᠭ᠃ ᠴᠠᠭ ᠦᠶ᠎ᠡ ᠳᠤ ᠠᠷᠴᠢᠭᠳᠠᠨ ᠠᠷᠢᠯᠵᠦ ᠪᠤᠢ ᠪᠢᠴᠢᠭᠳᠡᠨ ᠬᠦᠮᠦᠰ ᠲᠤ ᠢᠳᠡᠭᠡᠯ ᠵᠣᠷᠢᠭ᠂ ᠡᠷᠴᠢ ᠬᠦᠴᠦ ᠣᠯᠭᠤᠵᠦ ᠪᠠᠶᠢᠳᠠᠭ᠃ ᠵᠣᠬᠢᠶᠠᠭᠴᠢ ᠶᠢᠨ ᠠᠯᠮᠠᠶᠢᠷᠠᠯ ᠪᠤᠯ ᠰᠣᠶᠣᠯ ᠤᠨ ᠬᠤᠪᠢ ᠲᠠᠪᠢᠯᠠᠩ ᠤᠨ ᠲᠦᠯᠦᠬᠡᠨ ᠤ ᠠᠯᠮᠠᠶᠢᠷᠠᠯ ᠪᠦᠬᠡᠳ ᠲᠡᠬᠦᠨ ᠤ ᠬᠠᠰᠬᠢᠷᠣᠯ ᠪᠤᠯ ᠰᠣᠶᠣᠯ ᠤᠨ ᠪᠤᠴᠠᠵᠦ ᠬᠠᠳᠠᠭᠠᠯᠠᠭᠳᠠᠬᠤ ᠶᠢᠨ ᠲᠦᠯᠦᠬᠡᠨ ᠤ ᠬᠠᠰᠬᠢᠷᠣᠯ ᠶᠣᠮ᠃      ᠬᠤᠶᠠᠷ᠂ ᠨᠠᠶᠢᠷᠠᠭᠤᠯᠣᠯ ᠤᠨ ᠬᠡᠯᠪᠡᠷᠢ ᠮᠠᠶ᠋ᠢᠭ ᠤᠨ ᠰᠢᠨᠡᠴᠢᠯᠡᠯ      ︽ᠶᠢᠷᠳᠢᠨᠴᠣ ᠶᠢᠨ ᠬᠢᠵᠠᠭᠠᠷ ᠲᠠᠬᠢ ᠰᠠᠷᠠᠨ ᠤ ᠭᠡᠷᠡᠯ︾ ᠨᠣᠮ ᠤᠨ ᠪᠠᠰᠠ ᠨᠢᠬᠡ ᠠᠮᠵᠢᠯᠳᠠ ᠳᠤ ᠬᠦᠷᠦᠭᠰᠡᠨ ᠵᠦᠢᠯ ᠬᠡᠪᠡᠯ ᠲᠣᠰ ᠨᠣᠮ ᠳᠠᠬᠢ ᠨᠠᠶᠢᠷᠠᠭᠤᠯᠣᠯ ᠤᠳ ᠨᠢ ᠨᠠᠶᠢᠷᠠᠭᠤᠯᠣᠯ ᠤᠨ ᠵᠣᠬᠢᠶᠠᠯ ᠤᠨ ᠪᠢᠴᠢᠯᠬᠡ ᠶᠢᠨ ᠲᠠᠩ ᠴᠣᠯᠭᠤᠢ ᠠᠷᠭ᠎ᠠ ᠪᠠᠷᠢᠯ ᠠᠴᠠ ᠵᠠᠶᠢᠯᠠᠰᠬᠢᠵᠦ᠂ ᠰᠣᠷᠪᠤᠯᠵᠢᠯᠠᠭ᠎ᠠ ᠴᠢᠮᠡᠬᠡᠯᠡᠯ ᠤᠨ ᠠᠷᠭ᠎ᠠ᠂ ᠡᠷᠳᠡᠮ ᠰᠢᠨᠵᠢᠯᠡᠬᠡᠨ ᠤ ᠦᠬᠦᠯᠡᠯ ᠪᠢᠴᠢᠬᠦ ᠠᠷᠭ᠎ᠠ᠂ ᠲᠣᠭᠤᠵᠢᠰ ᠤᠨ ᠠᠷᠭ᠎ᠠ᠂ ᠺᠢᠨᠣ᠋ ᠶᠢᠨ ᠮᠣᠨᠲ᠋ᠠᠵᠢ ᠶᠢᠨ ᠠᠷᠭ᠎ᠠ᠂ ᠲᠣᠮᠤᠭ ᠲᠣᠣᠯᠢᠰ ᠤᠨ ᠠᠷᠭ᠎ᠠ ᠵᠡᠷᠬᠡ ᠶᠢ ᠣᠶᠠᠯᠳᠣᠭᠤᠯᠣᠨ ᠬᠡᠷᠡᠭᠯᠡᠭᠰᠡᠨ ᠳᠤ ᠪᠤᠢ᠃ ᠦᠩᠭᠡᠷᠡᠭᠰᠡᠨ ᠤ ᠨᠠᠶᠢᠷᠠᠭᠤᠯᠣᠯ ᠳᠤ ᠦᠵᠡᠮᠵᠢ ᠠᠴᠠ ᠰᠡᠳᠬᠢᠯᠬᠡ ᠲᠦᠷᠦᠭᠳᠡᠬᠦ᠂ ᠰᠡᠳᠬᠢᠯᠬᠡ ᠪᠠᠨ ᠦᠵᠡᠮᠵᠢ ᠪᠤᠳᠠᠰ ᠦᠵᠡᠭᠳᠡᠯ ᠳᠤ ᠠᠭᠤᠰᠬᠠᠬᠤ ᠲᠠᠩ ᠴᠣᠯᠭᠤᠢ ᠰᠡᠳᠬᠢᠯᠬᠡ ᠶᠢ ᠴᠢᠬᠤᠯᠠᠴᠢᠯᠠᠬᠤ ᠬᠡᠯᠪᠡᠷᠢ ᠵᠣᠩᠬᠢᠯᠠᠵᠦ ᠪᠠᠶᠢᠭᠰᠠᠨ ᠪᠤᠯ ᠲᠣᠰ ᠨᠣᠮ ᠤᠨ ᠵᠣᠬᠢᠶᠠᠭᠴᠢ ᠠᠶᠠᠯᠠᠭᠴᠢ᠂ ᠵᠠᠮᠴᠢ ᠮᠡᠳᠣ ᠪᠠᠷ ᠣᠩᠰᠢᠭᠴᠢ ᠶᠢ ᠲᠠᠭᠠᠭᠤᠯᠣᠨ ᠲᠡᠦᠬᠡ ᠶᠢᠨ ᠲᠣᠷᠠᠰᠬᠠᠯᠳᠣ ᠭᠠᠵᠠᠷ ᠤᠳ ᠢᠶᠠᠷ ᠠᠶᠠᠯᠠᠵᠦ᠂ ᠲᠡᠦᠬᠡ ᠬᠦᠣᠷᠨᠢᠨ ᠲᠣᠭᠠᠴᠢᠵᠦ᠂ ᠰᠢᠬᠦᠮᠵᠢᠯᠡᠭᠴᠢ ᠲᠠᠶᠢᠯᠪᠤᠷᠢᠯᠠᠭᠴᠢ ᠰᠢᠭ᠋ ᠲᠡᠦᠬᠡ ᠶᠢᠨ ᠬᠦᠮᠦᠨ ᠢ ᠦᠨᠡᠯᠡᠨ ᠰᠢᠬᠦᠮᠵᠢᠯᠡᠵᠦ᠂ ᠲᠡᠦᠬᠡᠳᠣ ᠬᠡᠷᠡᠭ ᠶᠠᠪᠣᠳᠠᠯ ᠢ ᠵᠠᠳᠠᠯᠣᠨ ᠰᠢᠬᠦᠮᠵᠢᠯᠡᠪᠡ᠃ ᠲᠣᠰ ᠨᠣᠮ ᠪᠤᠯ ᠵᠣᠬᠢᠶᠠᠭᠴᠢ ᠶᠢᠨ ᠠᠷᠪᠠ ᠭᠠᠷᠣᠢ ᠵᠢᠯ ᠤᠨ ᠬᠡᠬᠡᠷ᠎ᠡ ᠶᠢᠨ ᠪᠠᠶᠢᠴᠠᠭᠠᠯᠳᠠ ᠬᠢᠵᠦ ᠴᠣᠭᠯᠠᠭᠤᠯᠣᠭᠰᠠᠨ ᠮᠠᠲᠧᠷᠢᠶᠠᠯ ᠳᠤ ᠰᠠᠭᠤᠷᠢᠯᠠᠵᠦ ᠬᠢᠭᠰᠡᠨ ᠡᠷᠳᠡᠮ ᠰᠢᠨᠵᠢᠯᠡᠬᠡᠨ ᠤ ᠦᠬᠦᠯᠡᠯ ᠢᠶᠠᠨ ᠨᠠᠶᠢᠷᠠᠭᠤᠯᠣᠯ ᠤᠨ ᠵᠣᠬᠢᠶᠠᠯ ᠪᠤᠯᠭᠠᠵᠦ ᠪᠢᠴᠢᠭᠰᠡᠨ ᠵᠣᠬᠢᠶᠠᠯ ᠪᠤᠯᠬᠤᠷ ᠮᠡᠳᠡᠯᠬᠡᠳᠣ ᠴᠢᠨᠠᠷ ᠮᠠᠰᠢ ᠴᠢᠩᠭ᠎ᠠ ᠪᠠᠶᠢᠳᠠᠭ ᠨᠢ ᠲᠣᠰ ᠨᠣᠮ ᠤᠨ ᠲᠣᠪᠤᠶᠢᠮ᠎ᠠ ᠣᠨᠴᠠᠯᠢᠭ ᠪᠤᠯᠤᠨ᠎ᠠ᠃ ᠪᠢᠳᠡ ᠲᠣᠰ ᠨᠣᠮ ᠠᠴᠠ ︽ᠠᠯᠳᠠᠨᠭᠡᠷᠡᠯ︾ ︽ᠡᠷᠳᠡᠨᠢ ᠱᠠᠰᠳᠢᠷ︾ ︽ᠮᠤᠩᠭᠤᠯ ᠬᠤᠷᠳᠤᠨ ᠮᠤᠷᠢᠨ ᠤ ᠰᠢᠨᠵᠢ︾ ︽ᠠᠩ ᠤᠨ ᠰᠠᠩ︾ ︽ᠲᠦᠷᠪᠡᠨ ᠬᠠᠭᠠᠨ ᠤ ᠵᠠᠯᠪᠠᠷᠢᠯ︾ ︽ᠠᠯᠳᠠᠨ ᠡᠷᠢᠭᠡ︾ ︽ᠴᠠᠴᠤᠯᠢ ᠶᠢᠨ ᠪᠢᠴᠢᠭ︾ ︽ᠨᠠᠢᠮᠠᠨ ᠮᠢᠩᠭᠠᠳᠤ ᠤᠷᠤᠰᠢᠪᠠ︾ ︽ᠴᠠᠭᠠᠨ ᠪᠠᠳᠮ᠎ᠠ︾ ︽ᠪᠠᠨᠵᠠᠷᠠᠭᠴᠠ︾ ︽ᠵᠤᠰᠤ ᠶᠢᠨ ᠦᠭᠡ ᠬᠡᠮᠡᠬᠦ ᠰᠤᠳᠤᠷ ᠤᠷᠤᠰᠢᠪᠠ︾ ︽ᠮᠤᠩᠭᠤᠯ ᠤᠨ ᠤᠭ ᠡᠬᠢ ᠶᠢᠨ ᠲᠤᠭᠤᠵᠢ︾ ︽ᠬᠦᠮᠦᠨ ᠤ ᠰᠢᠨᠵᠢ︾ ᠭᠡᠬᠦ ᠵᠡᠷᠬᠡ ᠰᠣᠳᠣᠷ ᠬᠠᠳᠠᠭᠠᠯᠠᠬᠳᠠᠵᠦ ᠪᠠᠶᠢᠭ᠎ᠠ ᠶᠢ ᠣᠯᠵᠦ ᠮᠡᠳᠡᠪᠡ︔ ᠨᠤᠮ ᠨᠡᠭᠡᠭᠡᠬᠦ᠂ ᠨᠤᠮ ᠪᠠᠷᠢᠨᠳᠠᠭᠯᠠᠬᠤ᠂ ᠨᠤᠮ ᠪᠤᠮᠪᠠᠯᠠᠬᠤ᠂ ᠨᠤᠮ ᠰᠡᠪᠡᠷᠭᠡᠬᠦ᠂ ᠨᠤᠮ ᠪᠤᠰᠬᠠᠬᠤ᠂ ᠰᠤᠳᠤᠷ ᠵᠠᠯᠠᠬᠤ᠂ ᠰᠤᠳᠤᠷ ᠠᠴᠠ ᠠᠳᠢᠰᠯᠠᠬᠤ ᠵᠡᠷᠭᠡ ᠵᠠᠩ ᠦᠢᠯᠡ ᠲᠠᠢ ᠲᠠᠨᠢᠯᠴᠠᠪᠠ︔ ᠲᠣᠳᠣ ᠦᠰᠦᠭ ᠤᠨ ᠵᠣᠬᠢᠶᠠᠭᠳᠠᠭᠰᠠᠨ ᠲᠡᠦᠬᠡᠳᠣ ᠠᠬᠤᠢ᠂ ᠵᠣᠬᠢᠶᠠᠭᠳᠠᠭᠰᠠᠨ ᠶᠠᠪᠤᠴᠠ᠂ ᠲᠣᠳᠣ ᠦᠰᠦᠭ ᠤᠨ ᠣᠶᠢᠷᠠᠳ ᠤᠨ ᠲᠡᠦᠬᠡᠨ ᠳᠤ ᠦᠵᠡᠬᠦᠯᠦᠭᠰᠡᠨ ᠨᠦᠯᠦᠬᠡ ᠲᠡᠳᠣᠢ ᠦᠬᠡᠢ ᠮᠣᠩᠭᠤᠯᠴᠣᠳ ᠤᠨ ᠦᠰᠦᠭ ᠪᠢᠴᠢᠭ ᠤᠨ ᠲᠡᠦᠬᠡ ᠶᠢ ᠣᠶᠢᠯᠠᠭᠠᠪᠠ᠃ ︽ᠬᠠᠮᠤᠭ ᠰᠡᠬᠦᠯᠴᠢ ᠶᠢᠨ ᠮᠠᠭᠳᠠᠭᠠᠯ ᠬᠠᠶᠢᠯᠠᠭᠴᠢ︾ ᠵᠣᠬᠢᠶᠠᠯ ᠳᠤ᠂ ᠣᠶᠢᠷᠠᠳᠴᠣᠳ ᠤᠨ ᠪᠠᠷ ᠤᠨ ᠨᠣᠮ ᠤᠨ ᠰᠣᠳᠣᠯᠭᠠᠨ ᠤ ᠪᠠᠶᠢᠳᠠᠯ ᠢ ᠲᠠᠨᠢᠯᠴᠠᠭᠤᠯᠵᠦ᠂ ᠣᠶᠢᠷᠠᠳᠴᠣᠳ ᠤᠨ ᠨᠣᠮ ᠬᠡᠪᠯᠡᠯ ᠤᠨ ᠲᠡᠦᠬᠡ ᠶᠢ 18 ᠳ᠋ᠣᠭᠠᠷ ᠵᠠᠭᠤᠨ ᠪᠤᠶᠤ ᠭᠠᠯᠳᠠᠨᠴᠡᠷᠡᠩ ᠬᠠᠨ ᠤ ᠦᠶ᠎ᠡ ᠠᠴᠠ ᠡᠬᠢᠯᠡᠭᠰᠡᠨ ᠭᠡᠬᠦ ᠦᠵᠡᠯᠳᠡ ᠲᠣᠷᠠᠳᠴᠣ᠂ ᠡᠨᠡ ᠦᠵᠡᠯᠳᠡ ᠪᠠᠨ ᠪᠠᠷᠢᠮᠳᠠ ᠪᠠᠷ ᠨᠣᠳᠠᠯᠠᠭᠰᠠᠨ ᠪᠠᠶᠢᠨ᠎ᠠ᠃ ︽ᠰᠢᠪᠠᠷ ᠬᠡᠷᠡᠮ ᠤᠨ ᠲᠣᠳᠣᠷ᠎ᠠ ᠠᠰᠠᠭᠰᠠᠨ ᠵᠣᠯᠠ ᠶᠢᠨ ᠭᠡᠷᠡᠯ︾ ᠳᠤ ᠮᠣᠩᠭᠤᠯᠴᠣᠳ ᠤᠨ ᠨᠣᠮ ᠪᠢᠴᠢᠭ ᠬᠠᠳᠠᠭᠠᠯᠠᠳᠠᠭ ᠦᠬᠡᠢ ᠭᠡᠬᠦ ᠦᠵᠡᠯᠳᠡ ᠶᠢ ᠪᠠᠷᠢᠮᠳᠠ ᠪᠠᠷ ᠨᠢᠴᠣᠭᠠᠵᠦ᠂ ᠮᠣᠩᠭᠤᠯᠴᠣᠳ ᠤᠨ ᠨᠣᠮ ᠪᠢᠴᠢᠭ ᠬᠠᠳᠠᠭᠠᠯᠠᠵᠦ ᠪᠠᠶᠢᠭᠰᠠᠨ ᠪᠦᠬᠡᠳ ᠬᠠᠳᠠᠭᠠᠯᠠᠭᠰᠠᠭᠠᠷ ᠪᠠᠶᠢᠨ᠎ᠠ ᠭᠡᠳᠡᠭ ᠦᠵᠡᠯᠳᠡ ᠶᠢ ᠲᠡᠪᠰᠢᠬᠦᠯᠪᠡ᠃ ᠲᠡᠶᠢᠮᠦ ᠠᠴᠠ ᠦᠵᠡᠯᠳᠡ ᠲᠣᠳᠣ᠂ ᠦᠵᠡᠯ ᠰᠠᠨᠠᠭ᠎ᠠ ᠲᠣᠳᠣᠷᠬᠠᠢ᠂ ᠪᠠᠷᠢᠮᠳᠠ ᠦᠨᠡᠨ᠂ ᠢᠳᠡᠭᠡᠬᠦᠯᠬᠦ ᠬᠦᠴᠦᠨ ᠴᠢᠩᠭ᠎ᠠ ᠪᠤᠯᠵᠦ ᠴᠢᠳᠠᠵᠠᠢ᠃ ︽ᠮᠣᠩᠭᠤᠯ ᠰᠣᠶᠣᠯ ᠢ ᠠᠯᠪᠠ ᠪᠠᠷ᠂ ᠦᠬᠦᠮᠡᠯ ᠢᠶᠠᠷ ᠡᠷᠬᠦᠭᠰᠡᠨ ᠮᠠᠭᠳᠠᠭᠰᠠᠨ ᠪᠢᠰᠢ᠂ ᠰᠣᠶᠣᠯ ᠤᠨ ᠬᠦᠨ ᠲᠠᠯ᠎ᠠ ᠠᠴᠠ ᠨᠢ ᠪᠠᠷᠢᠮᠳᠠ ᠲᠠᠢ ᠦᠬᠦᠯᠡᠬᠦ ᠭᠡᠰᠡᠨ ᠪᠤᠯ ᠲᠡᠬᠦᠪᠤᠷᠢ ᠶᠢᠨ ᠮᠢᠨᠢ ᠭᠤᠣᠯ ᠬᠠᠷᠠᠯᠳᠠ ᠪᠠᠶᠢᠭᠰᠠᠨ︾ ︵︽ᠰᠢᠷ᠎ᠠ ᠮᠦᠷᠡᠨ︾ ᠰᠡᠳᠬᠦᠯ᠂ 2015 ᠣᠨ ᠤ 1 ᠳ᠋ᠣᠭᠡᠷ ᠬᠤᠭᠤᠴᠠᠭ᠎ᠠ︶ ᠭᠡᠵᠦ ᠵᠣᠬᠢᠶᠠᠭᠴᠢ ᠶᠢᠨ ᠦᠬᠦᠯᠡᠭᠰᠡᠨ ᠰᠢᠭ ᠲᠣᠰ ᠲᠡᠬᠦᠪᠤᠷᠢ ᠨᠢ ︽ᠡᠷᠳᠡᠮ ᠰᠢᠨᠵᠢᠯᠡᠬᠡᠨ ᠤ ᠦᠵᠡᠯᠳᠡ ᠪᠠ ᠨᠡᠬᠦᠳᠡᠯ ᠰᠣᠶᠣᠯ ᠤᠨ ᠲᠣᠬᠠᠢ ᠲᠠᠶᠢᠯᠣᠯ︾ ᠪᠤᠯᠵᠦ ᠴᠢᠳᠠᠵᠠᠢ᠃       ᠭᠡᠪᠡᠴᠣ ᠲᠣᠰ ᠵᠣᠬᠢᠶᠠᠯ ᠨᠢ ᠴᠣᠯ ᠡᠷᠳᠡᠮ ᠰᠢᠨᠵᠢᠯᠡᠬᠡᠨ ᠤ ᠦᠬᠦᠯᠡᠯ ᠲᠠᠢ ᠪᠠᠰᠠ ᠠᠳᠠᠯᠢ ᠦᠬᠡᠢ ᠶᠣᠮ᠃ ᠵᠣᠬᠢᠶᠠᠭᠴᠢ ᠡᠷᠳᠡᠮ ᠰᠢᠨᠵᠢᠯᠡᠬᠡᠨ ᠤ ᠦᠬᠦᠯᠡᠯ ᠢ ᠲᠣᠭᠤᠵᠢᠰ ᠤᠨ ᠠᠷᠭ᠎ᠠ᠂ ᠺᠢᠨᠣ᠋ ᠶᠢᠨ ᠮᠣᠨᠲ᠋ᠠᠵᠢ᠂ ᠲᠣᠮᠤᠭ ᠲᠣᠣᠯᠢᠰ ᠤᠨ ᠠᠷᠭ᠎ᠠ ᠵᠡᠷᠬᠡ ᠲᠠᠢ ᠡᠪᠯᠢᠭ ᠰᠠᠶᠢᠬᠠᠨ ᠣᠶᠠᠯᠳᠣᠭᠤᠯᠣᠭᠰᠠᠨ ᠠᠴᠠ ᠣᠩᠰᠢᠬᠤ ᠳᠤ ᠵᠠᠯᠬᠠᠭᠤ ᠬᠦᠷᠬᠡᠮ᠎ᠡ ᠠᠮᠳᠠ ᠰᠢᠮᠳᠠ ᠦᠬᠡᠢ ᠪᠤᠯᠬᠤ ᠠᠴᠠ ᠵᠠᠶᠢᠯᠠᠰᠬᠢᠵᠦ ᠴᠢᠳᠠᠵᠠᠢ᠃       ︽ᠬᠠᠮᠤᠭ ᠰᠡᠬᠦᠯᠴᠢ ᠶᠢᠨ ᠮᠠᠭᠳᠠᠭᠠᠯ ᠬᠠᠶᠢᠯᠠᠭᠴᠢ︾ ᠵᠣᠬᠢᠶᠠᠯ ᠡᠬᠢᠯᠡᠮᠡᠭᠴᠠ ᠰᠣᠷᠪᠤᠯᠵᠢᠯᠠᠭ᠎ᠠ ᠶᠢᠨ ᠬᠡᠯᠪᠡᠷᠢ ᠪᠠᠷ ᠬᠤᠭᠠᠢ ᠠᠪᠤ ᠲᠠᠢ ᠠᠭᠤᠯᠵᠠᠬᠤ ᠠᠴᠠ ᠡᠮᠦᠨᠡᠬᠢ ᠶᠠᠪᠤᠴᠠ᠂ ᠠᠭᠤᠯᠵᠠᠨ ᠶᠠᠷᠢᠯᠴᠠᠭᠰᠠᠨ᠂ ᠬᠤᠭᠠᠢ ᠠᠪᠤ ᠶᠢᠨ ᠨᠠᠮᠳᠠᠷ ᠲᠡᠦᠬᠡ ᠶᠢ ᠲᠣᠭᠠᠴᠢᠭᠰᠠᠨ ᠪᠤᠯ᠂ ᠲᠠᠷᠠᠭᠠᠬᠢ ︽ᠨᠣᠮ ᠨᠡᠬᠡᠬᠡᠬᠦ︾ ᠵᠠᠩ ᠦᠢᠯᠡ ᠶᠢᠨ ᠲᠣᠬᠠᠢ ᠲᠠᠨᠢᠯᠴᠠᠭᠤᠯᠭ᠎ᠠ ᠪᠠ ᠨᠣᠮ ᠬᠡᠪᠯᠡᠯ ᠤᠨ ᠲᠣᠬᠠᠢ ᠡᠷᠳᠡᠮ ᠰᠢᠨᠵᠢᠯᠡᠬᠡᠨ ᠤ ᠦᠬᠦᠯᠡᠯ ᠪᠤᠯᠤᠭᠰᠠᠨ ᠪᠠᠶᠢᠳᠠᠭ᠃       ᠲᠣᠰ ᠨᠣᠮ ᠤᠨ ᠠᠭᠤᠯᠭ᠎ᠠ ᠰᠡᠳᠣᠪ ᠨᠢ ᠲᠣᠮᠣ᠂ ᠬᠠᠮᠣᠷᠣᠭᠰᠠᠨ ᠴᠠᠭ ᠣᠷᠳᠣ᠂ ᠪᠠᠷᠤᠭ ᠬᠠᠭᠠᠰ ᠮᠢᠩᠭᠠᠨ ᠵᠢᠯ ᠤᠨ ᠦᠭᠡᠯᠡᠳ ᠤᠨ ᠲᠡᠦᠬᠡ ᠶᠢ ᠪᠢᠴᠢᠪᠡ᠃ ᠡᠶᠢᠮᠦ ᠶᠡᠭᠡ ᠴᠠᠭ ᠣᠷᠣᠨ ᠵᠠᠢ ᠶᠢᠨ ᠬᠡᠷᠡᠭ ᠣᠴᠢᠷ ᠢ ᠦᠬᠦᠯᠡᠵᠦ ᠬᠦᠣᠷᠨᠢᠬᠦ ᠳᠤ ᠲᠣᠮᠣ ᠬᠠᠭᠤᠳᠠᠰᠣ ᠱᠠᠭᠠᠷᠳᠠᠭᠳᠠᠨ᠎ᠠ᠃ ᠭᠡᠪᠡᠴᠣ ᠲᠣᠰ ᠨᠣᠮ ᠣᠨᠵᠠᠷᠠᠭᠤ ᠰᠣᠨᠵᠢᠷᠠᠭᠤ ᠰᠠᠨᠠᠭᠳᠠᠭᠤᠯᠬᠤ ᠦᠬᠡᠢ ᠪᠠᠶᠢᠭ᠎ᠠ ᠨᠢ ᠵᠣᠬᠢᠶᠠᠭᠴᠢ ᠶᠢᠨ ᠺᠢᠨᠣ᠋ ᠶᠢᠨ ᠮᠣᠨᠲ᠋ᠠᠵᠢ ᠶᠢᠨ ᠠᠷᠭ᠎ᠠ ᠶᠢ ᠠᠰᠢᠳᠠᠢ ᠰᠠᠶᠢᠬᠠᠨ ᠬᠡᠷᠡᠭᠯᠡᠭᠰᠡᠨ ᠳᠤ ᠪᠤᠢ᠃ ᠡᠨᠡ ᠠᠷᠭ᠎ᠠ ᠶᠢ ᠬᠡᠷᠡᠭᠯᠡᠭᠰᠡᠨ ᠠᠴᠠ ᠶᠡᠭᠡ ᠬᠡᠮᠵᠢᠶᠠᠨ ᠤ ᠬᠡᠷᠡᠭ ᠦᠬᠡᠢ ᠵᠦᠢᠯ ᠢ ᠲᠠᠶᠠᠭᠳᠠᠵᠦ ᠂ ᠣᠬᠢ ᠰᠢᠯᠢᠳᠡᠭ ᠢ ᠨᠢ ᠰᠢᠷᠭᠠᠭᠠᠵᠦ᠂ ᠬᠠᠮᠤᠭ ᠠᠮᠢᠳᠣᠯᠢᠭ ᠪᠦᠬᠡᠳ ᠪᠠᠶᠠᠯᠢᠭ ᠲᠣᠭᠠᠴᠢᠯ ᠪᠤᠯᠵᠦ ᠴᠢᠳᠠᠵᠠᠢ᠃ ᠲᠡᠷᠡ ᠨᠢ ᠬᠦᠦᠷᠨᠢᠭᠴᠢ ᠶᠢᠨ ᠵᠣᠭᠰᠣᠴᠠ ᠬᠠᠷᠠᠭᠠᠰᠣ ᠶᠢ ᠰᠤᠯᠢᠪᠴᠠᠭᠤᠯᠤᠨ᠂ ᠵᠣᠬᠢᠶᠠᠭᠴᠢ ᠶᠢᠨ ᠪᠤᠰᠣᠳᠴᠢ ᠲᠣᠭᠠᠴᠢᠯᠳᠠ ᠠᠴᠠ ᠰᠡᠳᠬᠢᠯᠬᠡ ᠶᠢᠨ ᠪᠡᠶᠡᠴᠢ ᠢᠯᠡᠷᠡᠬᠦᠯᠦᠯ ᠪᠤᠯᠵᠦ ᠴᠢᠳᠠᠭᠰᠠᠨ᠃ ᠺᠢᠨᠣ᠋ ᠶᠢᠨ ᠦᠵᠡᠭᠳᠡᠯ ᠰᠣᠯᠢᠵᠦ ᠪᠠᠶᠢᠭ᠎ᠠ ᠰᠢᠭ᠋ ᠵᠣᠬᠢᠶᠠᠯ ᠢ ᠠᠶᠢᠵᠠᠮ ᠲᠠᠢ ᠪᠤᠯᠭᠠᠵᠦ᠂ ᠣᠩᠰᠢᠭᠴᠢ ᠶᠢᠨ ᠬᠦᠯᠢᠶᠡᠨ ᠠᠪᠬᠤ ᠰᠡᠳᠬᠢᠴᠠ ᠶᠢ ᠨᠦᠯᠦᠬᠡᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠲᠡᠦᠬᠡ ᠠᠬᠤᠢ ᠶᠢᠨ ᠰᠣᠯᠢᠪᠴᠠᠯ ᠲᠣᠮᠳᠠ ᠲᠡᠦᠬᠡ ᠠᠴᠠ ᠠᠬᠤᠢ ᠬᠦᠷᠴᠣ᠂ ᠠᠬᠤᠢ ᠠᠴᠠ ᠲᠡᠦᠬᠡ ᠬᠦᠷᠴᠣ ᠴᠢᠳᠠᠭᠰᠠᠨ ᠪᠠᠶᠢᠨ᠎ᠠ᠃      ︽ᠰᠢᠪᠠᠷ ᠬᠡᠷᠡᠮ ᠤᠨ ᠲᠣᠳᠣᠷ᠎ᠠ ᠠᠰᠠᠭᠰᠠᠨ ᠵᠣᠯᠠ ᠶᠢᠨ ᠭᠡᠷᠡᠯ︾ ᠨᠢ ᠲᠣᠮᠤᠭ ᠢᠶᠠᠷ ᠡᠬᠢᠯᠡᠵᠦ ᠲᠣᠮᠤᠭ ᠢᠶᠠᠷ ᠲᠡᠬᠦᠰᠦᠭᠰᠡᠨ ᠶᠣᠮ᠃ ᠵᠣᠬᠢᠶᠠᠯ ᠡᠬᠢᠯᠡᠩᠬᠦᠳᠡ ︽ᠰᠣᠯᠬᠠᠷᠨᠠᠢ ᠶᠢᠨ ᠲᠣᠭᠤᠵᠢ︾ ᠶᠢ ᠪᠢᠴᠢᠵᠦ᠂ ᠡᠨᠡ ᠲᠣᠮᠤᠭ ᠢᠶᠠᠷ ᠲᠠᠮᠵᠢᠭᠤᠯᠣᠨ ᠦᠪᠡᠷ ᠤᠨ ᠰᠣᠳᠣᠷ ᠨᠣᠮ ᠬᠠᠳᠠᠭᠠᠯᠠᠬᠳᠠᠳᠠᠭ ᠮᠦᠷᠳᠡᠯ᠎ᠡ ᠪᠠᠨ ᠪᠤᠰᠣᠳ ᠠᠴᠠ ᠨᠢᠭᠤᠵᠦ ᠬᠠᠷᠠᠮᠨᠠᠯ ᠦᠬᠡᠢ ᠪᠠᠶᠢᠳᠠᠭ ᠦᠬᠡᠯᠡᠳ ᠠᠷᠠᠳ ᠲᠦᠮᠡᠨ ᠤ ᠡᠷᠬᠢᠮ ᠲᠡᠬᠡᠳᠣ ᠵᠠᠩ ᠴᠢᠨᠠᠷ ᠢ ᠢᠯᠡᠷᠡᠬᠦᠯᠦᠭᠰᠡᠨ ᠪᠤᠯ᠂ ᠨᠣᠮ ᠪᠢᠴᠢᠭ ᠢ ᠨᠢᠭᠤᠴᠠᠯᠠᠨ ᠬᠠᠳᠠᠭᠠᠯᠠᠳᠠᠭ ᠮᠣᠩᠭᠤᠯ ᠰᠣᠶᠣᠯ ᠤᠨ ᠡᠴᠢᠨ᠎ᠡ ᠬᠦᠨ ᠲᠠᠪᠬᠤᠷᠭ᠎ᠠ ᠶᠢᠨ ᠨᠡᠬᠡᠬᠡᠵᠦ ᠴᠢᠳᠠᠰᠢ ᠦᠬᠡᠢ ᠨᠢᠭᠤᠴᠠᠭᠠᠢ ᠣᠨᠢᠰᠣ ᠶᠢ ᠲᠠᠶᠢᠯᠪᠤᠷᠢᠯᠠᠨ ᠭᠠᠷᠭᠠᠬᠤ ᠶᠢᠨ ᠲᠦᠯᠦᠬᠡ ᠡᠷᠳᠡᠮ ᠰᠢᠨᠵᠢᠯᠡᠬᠡᠨ ᠤ ᠦᠬᠦᠯᠡᠯ ᠤᠨ ᠰᠣᠳᠣᠯᠭᠠᠨ ᠤ ᠪᠠᠶᠢᠳᠠᠯ ᠢ ᠲᠦᠢᠮᠦᠴᠢᠯᠠᠨ ᠪᠢᠴᠢᠬᠦ ᠠᠴᠠ ᠵᠠᠶᠢᠯᠠᠰᠬᠢᠨ ᠲᠣᠮᠤᠭ ᠪᠢᠴᠢᠬᠦ ᠪᠢᠴᠢᠯᠬᠡ ᠶᠢᠨ ᠠᠷᠭ᠎ᠠ ᠪᠠᠷ ᠷᠢᠳᠢ ᠰᠢᠳᠢ ᠶᠢᠨ ᠦᠩᠬᠡ ᠠᠶᠠᠰ ᠣᠷᠣᠭᠤᠯᠣᠭᠰᠠᠨ ᠠᠴᠠ ᠣᠩᠰᠢᠬᠤ ᠳᠤ ᠣᠨᠵᠢᠷᠠᠭᠤ ᠰᠠᠨᠠᠭᠳᠠᠭᠤᠯᠬᠤ ᠦᠬᠡᠢ ᠪᠤᠯᠵᠦ ᠴᠢᠳᠠᠵᠠᠢ᠃      ︽ᠦᠭᠡᠯᠡᠳᠴᠣᠳ ᠤᠨ ᠰᠣᠶᠣᠯ ᠲᠡᠦᠬᠡ ᠶᠢᠨ ᠮᠠᠲᠧᠷᠢᠶᠠᠯ ᠢ ᠠᠰᠢᠬᠯᠠᠵᠤ ᠮᠣᠩᠭᠤᠯ ᠨᠡᠬᠦᠳᠡᠯ ᠤᠨ ᠪᠤᠯᠪᠠᠰᠣᠨ ᠳᠤ ᠬᠢᠭᠰᠡᠨ ᠵᠣᠬᠢᠶᠠᠭᠴᠢ ᠶᠢᠨ ᠲᠣᠩᠭᠠᠯᠳᠠ︾ ᠪᠠ ︽ᠲᠡᠭᠷᠢ ᠭᠠᠵᠠᠷ ᠤᠨ ᠲᠣᠮᠳᠠ ᠪᠤᠰᠤᠭ᠎ᠠ ᠶᠠᠪᠤᠭᠰᠠᠨ ᠮᠣᠩᠭᠤᠯᠴᠣᠳ︾ ᠵᠡᠷᠬᠡ ᠲᠣᠷᠪᠢᠯᠢᠭ ᠨᠠᠶᠢᠷᠠᠭᠤᠯᠣᠯ ᠪᠠ ︽ᠲᠠᠯᠠᠪᠴᠢ ᠦᠬᠡᠢ ᠰᠢᠪᠠᠭᠤ︾ ᠵᠡᠷᠬᠡ ᠰᠢᠯᠦᠭ ᠤᠨ ᠲᠡᠬᠦᠪᠤᠷᠢ ᠬᠡᠪᠯᠡᠬᠦᠯᠵᠦ ᠶᠠᠪᠤᠭᠰᠠᠨ ᠵᠣᠬᠢᠶᠠᠭᠴᠢ ᠶᠢᠨ ᠵᠣᠬᠢᠶᠠᠨ ᠪᠢᠴᠢᠯᠬᠡ ᠶᠢᠨ ᠲᠣᠷᠰᠢᠯᠭ᠎ᠠ ᠲᠣᠰ ᠨᠣᠮ ᠤᠨ ᠪᠢᠴᠢᠭᠳᠡᠬᠦ ᠳᠤ ᠶᠡᠭᠡ ᠬᠦᠴᠦ ᠨᠡᠮᠡᠭᠰᠡᠨ ᠶᠣᠮ᠃ ᠢᠷᠡᠯᠳᠠ᠄ ᠲᠤᠮᠳᠠᠳᠦ ᠤᠯᠤᠰ ᠤᠨ ᠮᠤᠩᠭᠤᠯ ᠬᠡᠯᠡᠨ ᠤ ᠰᠤᠨᠢᠨ ᠮᠡᠳᠡᠭᠡ ᠶᠢᠨ ᠰᠦᠯᠵᠢᠶ᠎ᠠ ᠲᠡᠪᠰᠢᠭᠦᠯᠦᠭᠰᠡᠨ ᠨᠢ᠄ ᠤᠶᠠᠬᠠᠨ
  
ᠢᠷᠡᠯᠲᠡ᠄ ᠲᠤᠮᠳᠠᠳᠦ ᠤᠯᠤᠰ ᠤᠨ ᠮᠤᠩᠭᠤᠯ ᠬᠡᠯᠡᠨ ᠤ ᠰᠤᠨᠢᠨ ᠮᠡᠳᠡᠭᠡ ᠶᠢᠨ ᠰᠦᠯᠵᠢᠶ᠎ᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠰᠤᠶᠤᠯ ᠤᠨ ᠨᠠᠨᠳᠢᠨ ᠦᠪ ᠪᠤᠯᠬᠤ ᠬᠡᠰᠡᠷ ᠰᠤᠳᠤᠯᠤᠯ ᠤᠨ ᠳᠤᠬᠠᠢ
ᠨᠡᠶᠢᠭᠡᠮ ᠤᠨ ᠬᠤᠪᠢᠰᠣᠯᠳᠠ ᠲᠣᠮᠳᠠᠬᠢ ᠴᠦᠬᠡᠨ ᠲᠣᠭᠠᠳᠣ ᠦᠨᠳᠦᠰᠦᠳᠡᠨ ᠤ ᠣᠷᠠᠨ ᠵᠣᠬᠢᠶᠠᠯ ᠤᠨ ᠬᠦᠭᠵᠢᠯᠲᠡ
ᠮᠣᠩᠭᠤᠯ ᠰᠣᠶᠣᠯ ᠤᠨ ᠲᠦᠯᠦᠭᠡᠯᠡᠬᠦ ᠴᠢᠨᠠᠷᠲᠠᠢ ᠨᠣᠮ ᠪᠢᠴᠢᠭ
ᠤᠳᠬ᠎ᠠ ᠣᠷᠠᠯᠢᠭ ᠴᠡᠴᠡᠭᠯᠡᠨ ᠬᠦᠭᠵᠢᠭᠰᠡᠨ ᠰᠢᠨ᠎ᠡ ᠴᠠᠭ ᠦᠶ᠎ᠡ ᠶᠢ ᠤᠭᠳᠤᠨ ᠠᠪᠴᠢᠷᠠᠯ᠎ᠠ
ᠣᠷᠴᠢᠭᠤᠯᠭ᠎ᠠ ᠶᠢᠨ ᠵᠣᠬᠢᠶᠠᠯ ᠪᠠ ᠣᠯᠠᠨ ᠤ ᠬᠦᠷᠳᠡᠭᠡᠯ
2014-2019 ©  ᠮᠦᠩᠭᠡᠭᠠᠯ ᠮᠣᠩᠭᠤᠯ ᠰᠣᠶᠣᠯ ᠤᠨ ᠠᠵᠣ ᠠᠬᠤᠶᠢᠯᠠᠯ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备11000440号-2