ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠳᠦᠷᠪᠡᠳ ᠰᠤᠨᠢᠷᠬᠠᠯ
ᠡᠬᠡ ᠨᠤᠳᠤᠭ ᠤᠨ ᠮᠠᠭᠳᠠᠭᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019-11-12
 ᠲᠤᠮᠤᠭ ᠦᠪᠯᠡᠭᠰᠡᠨ ︽ᠪᠠᠶᠠᠨ ᠠᠭᠤᠯᠠ︾ ᠦᠷᠳᠡᠭᠡ ᠠᠯᠤᠰᠯᠠᠭᠰᠠᠨ ᠪᠠᠷ᠎ᠠ ᠲᠠᠢ ᠤᠭ ᠰᠤᠶᠢᠭᠰᠠᠨ ︽ᠵᠠᠬ᠎ᠠ ᠲᠤᠯᠤᠭᠠᠢ︾ ᠡᠭᠦᠯᠡ ᠵᠦᠰᠦᠭᠰᠡᠨ ᠤᠷᠤᠢ ᠲᠠᠢ ᠤᠩᠭᠤᠨ ᠰᠡᠳᠡᠷᠳᠦ ︽ᠰᠢᠷ᠎ᠠ ᠬᠠᠳᠠ︾ ᠤᠪᠤᠭᠠᠨ ᠤ ᠱᠠᠩ ᠬᠡᠰᠢᠭ ᠲᠠᠢ ᠦᠷᠦᠴᠡ ᠨᠢ ᠭᠠᠭᠴᠠ ︽ᠪᠢᠳᠡᠭᠦᠨ ᠤ ᠡᠪᠦᠯᠵᠢᠶ᠎ᠡ︾ ᠤᠷᠴᠢᠯᠠᠩ ᠤᠨ ᠲᠡᠯᠭᠡᠷ ᠦᠳᠡᠰᠢᠯᠡᠭᠡ ᠲᠠᠢ ᠲᠡᠭᠡᠳᠦᠰ ᠤᠨ ᠦᠯᠦᠭᠡᠢ ︽ᠡᠷᠳᠡᠨᠢᠳᠠᠪᠬᠤᠷ︾ ᠪᠤᠮᠠᠨ ᠰᠦᠷᠦᠭ ᠲᠡᠭᠡᠨ ᠨᠦᠮᠦᠷᠢ ᠲᠠᠢ ᠲᠡᠭᠡᠳᠦ ᠶᠢᠨ ᠲᠠᠬᠢᠯᠭᠠᠳᠤ ︽ᠲᠦᠮᠡᠡᠦ᠋ᠯᠵᠠᠢ ᠤᠪᠤᠭ᠎ᠠ︾ ᠪᠤᠶᠠᠨ ᠰᠦᠵᠢᠭ ᠤᠨ ᠦᠮᠦᠭ ᠲᠠᠢ ᠠᠪᠤ ᠶᠢᠨ ᠮᠢᠨᠢ ᠬᠠᠵᠠᠭᠤᠯᠤᠭᠰᠠᠨ ︽ᠤᠪᠤᠭᠠᠳᠤ ᠶᠢᠨ ᠲᠠᠷᠠᠰᠤ︾ ᠵᠤᠷᠢᠭ ᠢ ᠮᠢᠨᠢ ᠬᠦᠪᠴᠢᠯᠡᠭᠰᠡᠨ ᠰᠦᠨ ᠲᠠᠯᠠᠢ ᠡᠵᠢ ᠶᠢᠨ ᠮᠢᠨᠢ ᠨᠤᠶᠢᠷᠰᠤᠭᠰᠠᠨ ︽ᠮᠦᠩᠭᠡ ᠶᠢᠨ ᠠᠮᠠ︾ ᠵᠤᠯᠪᠤᠭ᠎ᠠ ᠶᠢ ᠮᠢᠨᠢ ᠡᠷᠭᠦᠭᠰᠡᠨ ᠬᠠᠨ ᠰᠦᠮᠪᠦᠷ ᠪᠠᠵᠠᠵᠤ ᠡᠮᠭᠦᠭᠰᠡᠨ ᠰᠢᠷᠭᠠᠯ ᠰᠢᠷᠤᠢ — ᠱᠠᠳᠠᠩ ᠪᠦᠷᠡᠮ ᠯᠡ ᠶᠤᠮᠰᠠᠨ ᠱᠠᠯᠠᠵᠤ ᠰᠢᠮᠡᠭᠰᠡᠨ ᠱᠠᠩᠳᠠ ᠶᠢᠨ ᠤᠰᠤ — ᠤᠭᠤᠷᠠᠭ ᠰᠡᠭᠦᠯ ᠯᠡ ᠶᠤᠮᠰᠠᠨ ᠲᠦᠷᠦᠭᠦᠯᠦᠭᠰᠡᠨ ᠡᠬᠡ ᠶᠢᠨ ᠢᠯᠴᠢ ᠡᠨᠡᠷᠢᠯ ᠢ ᠰᠢᠩᠭᠡᠭᠡᠭᠰᠡᠨ ᠡᠯᠪᠡᠭ ᠨᠡᠭᠡᠢ ᠬᠦᠨᠵᠢᠯᠡ — ᠲᠦᠰᠢᠭᠦᠯᠦᠭᠰᠡᠨ ᠡᠴᠢᠭᠡ ᠶᠢᠨ ᠰᠠᠨᠠᠭ᠎ᠠ ᠰᠡᠳᠬᠢᠯ ᠢ ᠠᠭᠤᠯᠤᠭᠰᠠᠨ ᠰᠠᠷᠠᠭᠤᠯ ᠴᠡᠯᠡᠭᠡᠷ ᠲᠠᠯ᠎ᠠ — ᠡᠮᠡᠭᠡ ᠶᠢᠨ ᠰᠡᠳᠬᠢᠯᠳᠦ ᠡᠬᠡ ᠨᠤᠳᠤᠭ ᠡᠭᠡᠯᠢᠳᠦ ᠦᠨᠡᠨ ᠨᠢᠭᠡ ᠲᠡᠯᠡᠭᠡᠢ︕ ᠡᠯᠳᠴᠡ ᠠᠴᠠ ᠬᠦᠬᠡ ᠮᠤᠩᠭᠤᠯ ᠤᠨ ᠤᠷᠤᠨ ᠡᠷᠳᠡᠨᠢ ᠬᠦᠮᠦᠷᠭᠡᠯᠡᠭᠰᠡᠨ ᠮᠦᠩᠭᠦᠨ ᠤ ᠰᠠᠩ ᠡ︕ ︽ᠡᠩᠭᠡᠷ︾ ᠢᠶᠠᠨ ᠲᠠᠭᠠᠭᠰᠠᠨ ︽ᠨᠠᠷᠢᠨ ᠭᠤᠤᠯ︾ ᠠᠩᠭᠢᠷ ᠤᠭᠤᠷᠠᠭ ᠰᠢᠭ᠋ ᠢᠪᠢᠯᠭᠡ ᠲᠠᠢ ᠶᠠᠩᠭᠢᠷ ᠡᠭᠦᠷᠯᠡᠭᠰᠡᠨ ︽ᠤᠳᠠᠴᠢ︾ ᠶᠢᠨ ᠬᠠᠳᠠ ︽ᠠᠷᠭᠠᠯᠠᠩᠳᠤ︾ ᠶᠢᠨ ᠰᠠᠷᠬᠢᠶ᠎ᠠ ᠰᠢᠭ᠋ ᠢᠶᠠᠨ ᠪᠠᠷᠳᠠᠭ᠎ᠠ ᠲᠠᠢ ᠵᠡᠭᠡᠷ᠎ᠡ ᠲᠠᠭᠰᠢᠭᠰᠠᠨ ︽ᠬᠤᠯᠤᠰᠤᠳᠠᠢ︾ ᠶᠢᠨ ᠵᠤ ᠵᠡᠷᠭᠡᠯᠭᠡᠨ ᠤᠷᠤᠯᠳᠤᠭᠰᠠᠨ ᠲᠠᠯᠠᠪᠠᠢ ᠲᠠᠢ ᠵᠡᠭᠡᠰᠦ ᠨᠢ ᠲᠤᠱᠠᠭᠰᠠᠨ ︽ᠲᠦᠭᠦᠮ︾ ᠤᠨ ᠨᠠᠭᠤᠷ ᠵᠢᠭᠴᠢᠨ ᠭᠠᠯᠠᠭᠤᠳ ᠲᠠᠢ ᠪᠠᠨ ᠴᠡᠩᠭᠡᠭᠡᠨ ᠲᠠᠢ ᠰᠦᠵᠢᠷᠡᠭᠰᠡᠨ ᠬᠠᠶᠢᠷᠬᠠᠨ ︽ᠵᠠᠩᠰᠠᠩ ᠨᠤᠷᠪᠤ︾ ︽ᠰᠡᠵᠢᠭᠦᠷ︾᠂ ︽ᠲᠤᠯᠠᠭᠠᠨ︾ ᠳᠠᠭᠠᠨ ᠲᠦᠰᠢᠭ ᠲᠠᠢ ᠰᠦᠵᠢᠷᠡᠨ ᠮᠡᠯᠮᠡᠯᠵᠡᠭᠰᠡᠨ ︽ᠰᠦᠮ᠎ᠡ ᠶᠢᠨ ᠭᠤᠤᠯ︾ ᠰᠦᠢᠯᠡᠭᠰᠡᠨ ︽ᠵᠢᠷᠭᠠᠯᠠᠩᠳᠤ︾ ᠳᠠᠭᠠᠨ ᠴᠢᠳᠬᠤᠭᠠᠨ ᠲᠠᠢ ᠪᠡᠯᠴᠢᠭᠡᠷ ᠲᠤᠨᠢ ᠲᠠᠰᠤᠭᠰᠠᠨ ︽ᠪᠠᠶᠠᠨ ᠬᠤᠰᠢᠭᠤ︾ ︽ᠪᠡᠷᠭᠡ︾ ᠶᠢᠨ ᠲᠠᠪᠠᠭᠠᠨ ᠳᠠᠭᠠᠨ ᠰᠢᠨᠵᠢᠯᠡᠭᠡᠨ ᠲᠠᠢ ᠪᠢᠴᠢᠭ ᠲᠤᠨᠢ ᠨᠢᠳᠦᠯᠦᠭᠰᠡᠨ ︽ᠪᠤᠯᠤᠳᠠᠢ︾ ᠶᠢᠨ ᠰᠤᠷᠭᠠᠭᠤᠯᠢ ᠪᠢᠴᠢᠭ ᠤᠨ ᠲᠠᠷᠠᠬᠤᠨ ᠲᠠᠭᠠᠨ ᠰᠤᠷᠢᠭᠠᠨ ᠲᠠᠢ ᠮᠦᠯᠬᠦᠵᠤ ᠬᠦᠯᠵᠢᠭᠰᠡᠨ ᠡᠩᠭᠡᠰᠬᠡ ᠰᠢᠷᠤᠢ — ᠡᠳ᠋ ᠤᠨ ᠵᠦᠭᠡᠯᠡᠨ ᠨᠢ ᠶᠤᠮᠰᠠᠨ ᠮᠦᠮᠦᠵᠤ ᠬᠦᠷᠦᠪᠵᠢᠭᠰᠡᠨ ᠷᠠᠰᠢᠶᠠᠨ ︽ᠪᠤᠯᠠᠭ︾ — ᠡᠬᠡ ᠶᠢᠨ ᠰᠦ ᠯᠡ ᠶᠤᠮᠰᠠᠨ ᠲᠦᠷᠦᠭᠦᠯᠦᠭᠰᠡᠨ ᠡᠬᠡ ᠰᠢᠭ ᠡᠬᠡᠯ ᠪᠦᠰᠡᠭᠦᠶᠢᠴᠦᠳ ᠤᠨ ᠬᠦᠯᠦᠰᠦ ᠤᠷ᠎ᠠ ᠪᠠᠷ ᠬᠠᠳᠠᠭᠠᠭᠳᠠᠭᠰᠠᠨ ᠡᠩ ᠦᠭᠡᠢ ᠴᠠᠭᠠᠨ ᠲᠤᠭᠤᠷᠭ᠎ᠠ — ᠲᠦᠰᠢᠭᠦᠯᠦᠭᠰᠡᠨ ᠡᠴᠢᠭᠡ ᠰᠢᠭ ᠡᠷᠡᠯᠭᠡᠭ ᠵᠤᠷᠢᠯᠳᠠᠨ ᠤ ᠬᠦᠴᠦ ᠤᠶᠤᠨ ᠢᠶᠠᠷ ᠠᠮᠢᠯᠠᠭᠰᠠᠨ ᠡᠵᠡᠨ ᠲᠠᠢ ᠲᠠᠷᠬᠠᠨ ᠪᠠᠶᠢᠭᠠᠯᠢ —  ᠡᠪᠦᠭᠡ ᠶᠢ ᠰᠦᠷᠳᠦ ᠡᠬᠡ ᠨᠤᠳᠤᠭ ᠡᠷᠭᠡ ᠴᠢᠯᠦᠭᠡᠨ ᠤ ᠶᠡᠭᠡ ᠴᠠᠶᠢᠵᠠ︕ ᠵᠢᠷᠭᠠᠯ ᠤᠩᠭᠤᠯᠠᠭᠰᠠᠨ ᠠᠯᠳᠠᠨ ᠦᠯᠦᠭᠡᠢ ᠢᠨᠢᠶᠡᠳᠦ ᠡᠵᠡᠳᠦᠭᠰᠡᠨ ᠪᠤᠯᠤᠷ ᠬᠠᠷᠰᠢ ᠡ︕ ᠲᠠᠯ᠎ᠠ ᠶᠢᠨ ᠴᠡᠪᠡᠷ ᠠᠭᠠᠷ ᠬᠤᠷ᠎ᠠ ᠨᠢ ᠲᠠᠭᠠᠯᠠᠵᠤ ᠷᠠᠰᠢᠶᠠᠯᠠᠬᠤ ᠵᠠᠩ ᠲᠠᠢ ᠲᠠᠷᠠᠭ ᠴᠡᠭᠡ ᠶᠢᠨ ᠰᠢᠮ᠎ᠡ ᠲᠡᠵᠢᠭᠡᠯ ᠨᠢ ᠲᠠᠮᠢᠷᠵᠢᠭᠤᠯᠵᠤ ᠰᠡᠷᠭᠦᠭᠡᠬᠦ ᠡᠮ ᠲᠠᠢ ᠬᠦᠪᠴᠢ ᠬᠠᠩᠭᠠᠢ ᠶᠢᠨ ᠠᠷᠢᠭᠤᠨ ᠰᠠᠯᠬᠢ ᠨᠢ ᠬᠦᠷᠦᠰᠦᠵᠢᠭᠦᠯᠵᠤ ᠴᠢᠩᠭᠠᠷᠠᠭᠤᠯᠬᠤ ᠢᠳᠡ ᠲᠠᠢ ᠬᠦᠮᠡᠯᠢ ᠲᠠᠭᠠᠨ᠎ᠠ ᠶᠢᠨ ᠲᠤᠷᠤᠭ ᠱᠦᠯᠦ ᠨᠢ ᠬᠦᠯᠦᠷᠡᠭᠦᠯᠵᠤ ᠰᠢᠩᠭᠡᠯᠭᠡᠬᠦ ᠰᠢᠳᠢ ᠲᠠᠢ ᠭᠤᠪᠢ ᠰᠢᠯᠢ ᠶᠢᠨ ᠴᠠᠭᠠᠨ ᠰᠢᠭᠤᠷᠭ᠎ᠠ ᠨᠢ ᠭᠤᠶᠠᠳᠠᠵᠤ ᠦᠯᠴᠢᠷᠡᠰᠢᠭᠦᠯᠬᠦ ᠲᠤᠷᠪᠢ ᠲᠡᠮ ᠲᠠᠢ ᠭᠤᠶᠢᠪᠢᠰᠢ ᠦᠭᠡᠢ ᠦᠢᠯᠡᠰ ᠲᠡᠭᠡᠨ ᠦᠷᠡᠭᠳᠡᠬᠦ ᠵᠤᠷᠢᠭ ᠨᠢ ᠭᠤᠳᠤᠷᠠᠰᠢ ᠦᠭᠡᠢ ᠢᠳᠡᠭᠡᠯ ᠢ ᠲᠠᠪᠳᠠᠬᠤ ᠭᠠᠩ ᠲᠠᠢ ᠪᠢᠯᠢᠭ ᠢᠶᠠᠷ ᠴᠢᠮᠡᠭᠯᠡᠭᠰᠡᠨ ᠲᠧᠭᠨᠢᠭᠴᠢ ᠦᠬᠢᠳ ᠨᠢ ᠤᠳᠤᠮ ᠬᠠᠳᠠᠮ ᠲᠠᠭᠠᠨ ᠲᠠᠭᠠᠯᠠᠯ ᠬᠦᠨᠳᠦ ᠲᠠᠢ ᠰᠢᠯᠦᠭ ᠢᠶᠠᠷ ᠰᠡᠴᠡᠷᠭᠡᠭᠰᠡᠨ ᠤᠶᠤᠳᠠᠨ ᠬᠦᠪᠡᠭᠦᠳ ᠨᠢ ᠰᠠᠷᠠᠨ ᠪᠦᠮᠪᠦᠷᠴᠡᠭ ᠲᠤ ᠰᠠᠳᠤᠨ ᠲᠦᠷᠬᠦᠮ ᠲᠠᠢ ᠰᠠᠨᠠᠵᠤ ᠦᠨᠦᠰᠦᠭᠰᠡᠨ ᠨᠤᠳᠤᠭ ᠤᠨ ᠮᠢᠨᠢ᠂ ᠰᠢᠷᠤᠢ — ᠤᠶᠢᠷᠠᠰᠢ ᠦᠭᠡᠢ ᠭᠠᠨᠳᠢᠭ ᠬᠦᠷᠦᠰᠦ ᠰᠠᠨ ᠰᠠᠪᠠᠯᠠᠵᠤ ᠡᠪᠦᠷᠳᠦᠯᠡᠭᠰᠡᠨ ᠴᠡᠭᠡᠯ ᠤᠨ ᠤᠰᠤᠨ — ᠦᠳᠡᠯᠦᠰᠢ ᠦᠭᠡᠢ ᠮᠦᠩᠭᠡ ᠶᠢᠨ ᠵᠢᠰᠦ ᠰᠠᠨ ᠲᠦᠷᠦᠭᠦᠯᠦᠭᠰᠡᠨ ᠡᠬᠡ ᠰᠢᠭ ᠲᠦᠭ ᠲᠦᠮᠡᠨ ᠡᠵᠢ ᠶᠢᠨ ᠦᠭᠬᠢᠶᠡᠮᠦᠷ ᠬᠠᠶᠢᠷ᠎ᠠ ᠪᠠᠷ ᠨᠠᠮᠢᠷᠠᠭᠤᠯᠤᠭᠰᠠᠨ ᠢᠪᠡᠭᠡᠯᠳᠤ ᠮᠦᠩᠭᠦᠨ ᠲᠡᠭᠷᠢ — ᠲᠦᠰᠢᠭᠦᠯᠦᠭᠰᠡᠨ ᠡᠴᠢᠭᠡ ᠰᠢᠭ ᠪᠤᠮ ᠪᠤᠮᠠᠨ ᠠᠪᠤ ᠶᠢᠨ ᠢᠳᠡᠭᠡᠯ ᠢᠶᠠᠷ ᠮᠠᠨᠳᠤᠭᠰᠠᠨ ᠶᠢᠷᠳᠢᠨᠴᠤ ᠶᠢᠨ ᠨᠢᠭᠡᠨ ᠦᠴᠦᠭ︕  ᠡᠰᠡᠨᠢᠯ ᠤᠨ ᠪᠡᠯᠭᠡᠳᠦ ᠡᠬᠡ ᠨᠤᠳᠤᠭ ᠡᠵᠡᠨ ᠴᠢᠩᠭᠢᠰ ᠤᠨ ᠪᠠᠬᠢ ᠭᠤᠯᠤᠮᠳᠠ︕ ᠰᠠᠨᠰᠠᠷ ᠲᠤ ᠰᠤᠶᠤᠯ ᠢᠶᠠᠷ ᠢᠶᠠᠨ ᠲᠠᠷᠬᠠᠯᠠᠬᠤ ᠲᠦᠷᠦ ᠰᠠᠷ᠎ᠠ ᠲᠡᠭᠡᠷ᠎ᠡ ᠦᠵᠦᠭᠦᠷᠯᠡᠬᠦ ᠠᠪᠤᠷᠭᠤ ᠪᠦᠬᠡ ᠡ︕                       ᠷᠢᠨ᠊᠂ ᠰᠤᠳᠨᠠᠮ ᠮᠠᠭᠳᠠᠪᠠ
  
ᠢᠷᠡᠯᠲᠡ᠄ ᠲᠦᠷᠪᠡᠳ ᠮᠤᠩᠭᠤᠯᠴᠤᠳ ᠤᠨ ᠨᠤᠳᠤᠭ ᠤᠨ ᠲᠤᠮᠤᠭ ᠪᠤᠯᠤᠨ ᠢᠷᠦᠭᠡᠯ ᠮᠠᠭᠳᠠᠭᠠᠯ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠡᠵᠢ ᠶᠢᠨ ᠠᠴᠢᠯᠠᠯ ᠳᠤ — ᠭᠠᠯᠰᠠᠩ
ᠬᠡᠤᠬᠡᠳ ᠦᠰᠬᠡᠬᠦᠢ ᠶᠢᠨ ᠤᠬᠠᠭᠠᠨ ᠠᠴᠠ
ᠮᠠᠤ ᠵᠦᠰᠢ ᠶᠢᠨ ᠮᠤᠳᠤ — ᠮᠢᠨᠤ ᠨᠤᠲᠤᠭ ᠤᠨ ᠤᠳᠠ — ᠷᠢᠨ᠊᠂ ᠰᠤᠤᠨᠨᠠᠮ
ᠰᠦ ᠲᠠᠢ ᠪᠤᠷᠬᠠᠨ — ᠵᠢᠷᠡᠨᠴᠡᠴᠡᠭ ᠪᠠᠭᠰᠢ
2014-2019 ©  ᠮᠦᠩᠭᠡᠭᠠᠯ ᠮᠣᠩᠭᠤᠯ ᠰᠣᠶᠣᠯ ᠤᠨ ᠠᠵᠣ ᠠᠬᠤᠶᠢᠯᠠᠯ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备11000440号-2